Radhë të gjata automjetesh janë krijuar në disa pika të kalimit kufitar mes Kosovës dhe Serbisë, në ditën e votimit. Ndërkohë, në Rashkë është raportuar një numër i madh qytetarësh nga veriu i Kosovës, të cilët kanë shkuar për të votuar.
Sipas të dhënave të publikuara nga Qendra Kombëtare për Menaxhim Kufitar, pritjet për automjetet në disa vendkalime kufitare arrijnë nga 30 deri në 40 minuta në hyrje, ndërsa në dalje mund të zgjasin deri në dy orë.
Situata më e ngarkuar raportohet në Merdar, ku pritjet për dalje nga Kosova arrijnë deri në dy orë, ndërsa kolona e automjeteve është e gjatë rreth 3 mijë metra. Në Jarinjë, pritjet për dalje shkojnë deri në tri orë.
Në anën tjetër, mediat lokale nga veriu i Kosovës raportojnë për tollovi në vendvotimin në Rashkë, ku votojnë qytetarët nga kjo pjesë e Kosovës. Sipas raportimeve, vetëm gjysmë ore pas hapjes së vendvotimit, dy gra janë alivanosur për shkak të situatës së krijuar nga fluksi i madh i njerëzve.
Pritjet e gjata në kufi dhe grumbullimi i votuesve në Rashkë po karakterizojnë zhvillimet e ditës së votimit, ndërsa qytetarët që udhëtojnë drejt Serbisë për të ushtruar të drejtën e votës po përballen me vonesa në disa vendkalime kufitare.
