Një ngjarje e rëndë është regjistruar në Arrameras të Fushë-Krujës, ku 16-vjeçari Enes Isaku humbi jetën pasi ashensori në restorantin ku punonte si kamerier u shkëput papritur. Detaje të reja po dalin në dritë lidhur me rrethanat e aksidentit fatal, ndërsa policia ka vënë në pranga dy persona.
Sipas informacioneve paraprake, në momentin e ngjarjes, 16-vjeçari dhe kolegu i tij, Endri Stafuka, 26 vjeç, po shkëmbenin shaka me njëri-tjetrin. I mituri kishte hyrë në ashensor për të zbritur në katin e parë të restorantit, kur kolegu i tij dyshohet se e ka shtyrë me duar dhe ka aktivizuar butonin për zbritjen e ashensorit.
Në ato çaste, ashensori është shkëputur, duke bërë që i riu të përplasej me kokë në pllakat e dyshemesë. Përplasja rezultoi fatale për 16-vjeçarin, ndërsa edhe kamerieri tjetër dyshohet se është gjendur në rrezik për jetën nga shkëputja e papritur e pajisjes.
Një tjetër detaj i bërë i ditur lidhur me ngjarjen është se pak çaste përpara aksidentit, ashensori ishte përdorur edhe nga pronari i restorantit, Afrim Vathi, 62 vjeç, i cili është gjyshi i viktimës.
Në lidhje me tragjedinë, policia ka arrestuar 26-vjeçarin Endri Stafuka, i dyshuar për veprën penale “Vrasja nga pakujdesia”. Në pranga është vënë edhe pronari i restorantit, 62-vjeçari Afrim Vathi, i dyshuar për shkelje të rregullave të mbrojtjes në punë dhe fshehje të të ardhurave.
Ndërkohë, hetimet vijojnë për të sqaruar plotësisht dinamikën e ngjarjes, shkaqet që çuan në shkëputjen e ashensorit dhe përgjegjësitë për garantimin e sigurisë në ambientet e restorantit.
