Një studim i ri po shqyrton nëse vitamina C mund të ndikojë në çrregullimet e hershme të gjakut dhe të ndihmojë në parandalimin e zhvillimit të leukemisë.
Në provën klinike EVITA, 109 persona me citopeniklonale me rëndësi të pacaktuar (CCUS) ose sindromë mielodis plastike (MDS) morën 1,000 mg vitaminë C në ditë ose placebo për një vit. Të dyja gjendjet mund të përparojnë në leucemi mieloide akute (AML).
Rezultatet treguan se personat që morën vitaminë C patën më pak ngjarje të padëshiruara gjatë studimit dhe periudhës së ndjekjes. Vitamina C gjithashtu ndryshoi nivelet e disa citokinave, molekula që luajnë rol në inflamacion dhe në funksionimin e sistemit imunitar. Këto ndryshime u shoqëruan me rezultate më të favorshme.
Megjithatë, studiuesit nuk gjetën ndryshim të rëndësishëm mes dy grupeve në zgjerimin e kloneve anormale të qelizave të gjakut, një tregues i përparimit të sëmundjes.
Një analizë eksploruese pas rreth tre vitesh tregoi se personat që morën vitaminë C kishin më shumë gjasa të ishin gjallë sesa ata që morën placebo. Por, për shkak se ky ishte një studim relativisht i vogël i fazës së dytë, rezultati duhet të konfirmohet në një provë më të madhe.
Më shumë se gjysma e pjesëmarrësve kishin mungesë të vitaminës C në fillim të studimit. Vitamina C nuk ndihmon vetëm imunitetin; ajo mbështet edhe enzima që kontrollojnë aktivitetin e gjeneve. Një prej tyre, TET2, shpesh preket nga mutacionet te leukemia dhe çrregullimet e ngjashme të gjakut.
Studiuesit theksojnë se aktualisht nuk ka trajtim të miratuar posaçërisht për të parandaluar kalimin e CCUS në leukemi. Prandaj, rezultatet e EVITA janë premtuese, por ende paraprake. Studime më të mëdha do të nevojiten për të përcaktuar nëse vitamina C mund të bëhet një mënyrë e thjeshtë për të ndërhyrë përpara se leukemia të zhvillohet. /Scitech Daily
