Ndërtimi i një Muzeu Hebraik në Vlorë është kundërshtuar nga qytetarët të cilët protestuan kundër projektit. Debati solli edhe reagimin e kryeministrit Rama, i cili iu është përgjigjur kritikëve me një gjuhë të ashpër.
Deputetja e pavarur Marjana Koçeku shprehet se kundërshtimi i projektit nuk duhet barazuar me antisemitizmin.
Në një intervistë për Truth Times, Koçeku bëri një ndarje mes kritikave ndaj projektit dhe qëndrimeve armiqësore ndaj popullit hebre, duke argumentuar se shqetësimet për vendndodhjen, trashëgiminë kulturore dhe transparencën duhet të trajtohen më vete.
Koçeku tha se pjesa më e madhe e polemikave është përqendruar në afërsinë e muzeut me ndërtesën historike të lidhur me Klubin Patriotik “Labëria”, një vend që ajo e përshkroi si me “rëndësi të madhe simbolike” për Vlorën dhe për historinë kombëtare të Shqipërisë.
“Kundërshtimi i këtij projekti të veçantë të muzeut nuk e bën dikë antisemit. Kritika ndaj vendndodhjes, dizajnit apo ndikimit të tij në trashëgiminë kulturore të Vlorës nuk duhet të ngatërrohet kurrë me armiqësinë ndaj popullit hebre”, tha Koçeku.
Deputetja e pavarur tha për Truth Times, se shqetësimi i saj themelor është se si një kujtesë historike mund të ruhet “pa dëmtuar, zhvendosur ose zvogëluar panevojshëm një tjetër”.
Duke iu drejtuar pretendimeve që qarkullojnë në mediat sociale dhe midis disa protestuesve se muzeu mund të përfaqësojë fillimin e një pranie ose vendbanimi izraelit në Shqipëri, Koçeku tha se spekulime të tilla duheshin ndarë qartë nga shqetësimet legjitime në lidhje me trashëgiminë dhe transparencën.
“Mendoj se duhet të bëjmë dallimin me shumë kujdes midis shqetësimeve legjitime në lidhje me trashëgiminë kulturore, transparencën dhe vendimmarrjen publike, nga njëra anë, dhe spekulimeve në lidhje me Izraelin ose popullin hebre nga ana tjetër”, tha ajo.
Rama reagoi pas protestës së zhvilluar në Vlorë, duke i cilësuar pretendimet se po shkatërrohet Muzeu “Labëria” si “perverse dhe shpifarake”, duke argumentuar se Muzeu Hebraik po ndërtohet në një godinë tjetër pranë tij.
