Ndërkohë që faza e dytë e regjistrimit në fakultete është drejt përfundimit, sistemi “U-Albania” është përfshirë nga një bllokim, thuajse total. Të dhëna të mbërritura në “Boldnews.al” dhe të verifikuara nga redaksia, tregojnë se rubrika “Kuota të Lira” është tërësisht jashtë funksionit. Gjithashtu, edhe një tjetër rubrikë, “Këndi i maturantit”, gjithashtu “është i mbyllur”, sipas shënimit në sistem.
Pak javë më parë, Ministrja e Arsimit, Mirela Kumbaro, shprehu vlerësimin maksimal të saj dhe qeverisë që përfaqëson mbi mënyrën se si operon sistemi elektronik për regjistrimin e studentëve të rinj në Universitetet Shqiptare.
Por, situata aktuale tregon një panoramë shumë më ndryshe.
Çfarë sjell bllokimi?
Rubrika “Kuota të Lira” u jep mundësinë maturantëve, të cilët nuk janë regjistruar në fazën e parë, të zgjedhin një degë, në të cilën mund të kenë rezultuar fitues. Por, bllokimi i kësaj rubrike në sistem, i vendos kandidatët për studentë në një situatë errësire totale.
Pra, ligjërisht, ata kanë të drejtë të aplikojnë në këtë fazë të dytë, por praktikisht sistemi ua ka hequr këtë të drejtë. Ministria e Arsimit, deri në momentin e publikimit të këtij shkrimi, nuk ka dhënë asnjë sqarim për ç’akordimin e sistemit elektronik të regjistrimeve dhe as nuk është shprehur se cilat janë masat që do të merren për rikthimin e tij në funksionalitet normal.
Gjithashtu, nga Ministria e Arsimit nuk është bërë ende e ditur se çfarë do të ndodh me afatet, të cilat janë duke mbaruar, ndërkohë që kandidatët për studentë janë të privuar nga e drejta e tyre e zgjedhjes.
Afatet e regjistrimit
Procesi i regjistrimit të maturanëve që synojnë të ndjekin studimet e larta, kryhet në tre faza, nëpërmjet sistemit U-Albania.
Faza e parë shtrihet në periudhën 3 korrik deri në 9 shtator. Përgjatë kësaj kohe, maturantët regjistrohen, kryejnë pagesën e tarifës, zgjedhin 10 degë të preferuara. Më tej, procesi vijon me fazë e ankimit, regjistrimin që shtrihet në 7 faza 48-orëshe. Gjithashtu, deri në datë 9 shtator, maturantët kanë mundësi të ç’regjistrohen nga dega që kanë zgjedhur, në pritje të një alternative më të mirë që mund t’u shfaqet në fazën e dytë.
Faza e dytë shtrihet në harkun kohor nga 30 gushti në 5 tetor. Gjatë këtij afati kohor, ka disa nën-faza shumë të rëndësishme. Në datat 15-17 shtator, maturantët, të cilët nuk janë regjistruar në fazën e parë, kanë mundësinë që të përzgjedhin degët e tyre të preferuara.
Pra, janë vetëm dy ditë në dispozicionin e tyre për të bërë përzgjedhjen, gjithnjë nëpërmjet sistemit “U-Albania”. Por, për të bërë këtë përzgjedhje, ata natyrisht kanë nevojë të kenë informacion mbi kuotat e lira. Këtë informacion mund ta sigurojnë vetëm tek platforma U-Albania.
Por, siç konstatoi “Boldnews.al”, rubrika e “Kuotave të Lira” në sistemin e regjistrimit është tërësisht jashtë funksionit.
Redaksia, e cila ka ndjekur në vijimësi proceset e regjistrimit në universitete gjatë viteve të ndryshme, konstaton se një problematikë e tillë nuk ka ndodhur kurrë më parë.
