Pas pushimit veror, deputetët do të rikthehen në Kuvend këtë të martë, më 8 shtator, në orën 17:00, kur nis zyrtarisht sesioni i ri parlamentar.
Edhe pse Kushtetuta parashikon që sesioni i vjeshtës të nisë të hënën e parë të shtatorit, këtë herë rikthimi i deputetëve është shtyrë për shkak të pushimit zyrtar.
Në seancën e parë pritet të jetë në rend dite edhe dekreti i Presidentit për emërimin e Klodiana Spahiut në krye të Ministrisë së Shëndetësisë. Pas formalizimit të dekretit, Spahiu pritet të bëjë betimin në Kuvend, ndërsa socialistët do të duhet të përcaktojnë edhe emrin që do të zërë postin e nënkryetarit të Kuvendit, detyrë që deri tani mbahej prej saj.
Rikthimi i deputetëve në sallën e Kuvendit pritet të shoqërohet edhe me protesta jashtë godinës. “Revolucioni i Flamingove”, i cili prej afro 100 ditësh vijon protestën në shesh, ka paralajmëruar mobilizim gjatë nisjes së sesionit të ri parlamentar.
