Një 55-vjeçar shqiptar është plagosur me armë zjarri në orët e para të mëngjesit në zonën e Patisias, në Athinë.
Sipas raportimeve të mediave greke, bëhet fjalë për Eduart Mullajn, 55 vjeç, nga Delvina. Ngjarja ndodhi rreth orës 05:00, pranë banesës së tij, kur dy persona që lëviznin me motor iu afruan dhe hapën zjarr në drejtim të tij.
Mullaj mbeti i plagosur në pjesën e poshtme të trupit dhe u transportua me ambulancë drejt spitalit “Georgios Gennimatas”, ku ndodhet jashtë rrezikut për jetën.
Sipas dëshmisë së dhënë prej tij, dy autorët dyshohet se po tentonin t’i vidhnin motorin dhe kanë qëlluar pasi ai ka reaguar. Megjithatë, policia greke po heton edhe pista të tjera dhe nuk përjashton mundësinë që sulmi të ketë pasur një motiv tjetër.
Në vendngjarje, efektivët gjetën dhe sekuestruan tre gëzhoja dhe një predhë, ndërsa autorët u larguan menjëherë pas të shtënave.
Hetuesit po verifikojnë gjithashtu nëse 55-vjeçari ka pasur ndonjë konflikt apo përfshirje të mëparshme që mund të lidhet me sulmin, ndërsa po hetohet edhe një episod i mëparshëm me të shtëna në të njëjtën zonë.
Policia vijon punën për identifikimin dhe kapjen e dy autorëve.
