Një 36-vjeçare shtatzënë ka humbur jetën gjatë transportimit për ndihmë të specializuar mjekësore, ndërsa ngjarja ka sjellë nisjen e një procedimi penal ndaj tre mjekëve të maternitetit të Pogradecit.
Bëhet fjalë për M. K., 36 vjeçe, e cila ishte në muajin e shtatë të shtatzënisë. Mbrëmjen e 30 gushtit, ajo është paraqitur në maternitetin e Pogradecit në gjendje të rënduar shëndetësore.
Pas ekzaminimeve, mjekët B. D., 35 vjeçe, A. T., 40 vjeç dhe S. Ç., 34 vjeç, kanë vendosur që pacientja të transportohej me autoambulancë drejt Tiranës, për të marrë trajtim më të specializuar.
Por gjatë rrugës gjendja e 36-vjeçares është përkeqësuar. Për këtë arsye, autoambulanca e ka dërguar në maternitetin e spitalit të Elbasanit, ku mjekët kanë konstatuar se ajo kishte ndërruar jetë.
Pas ngjarjes, ndaj tre mjekëve ka nisur procedimi penal, ndërsa materialet janë referuar në Prokurorinë e Korçës për veprime të mëtejshme.
Hetimet do të përcaktojnë nëse ka pasur neglizhencë apo shkelje të procedurave mjekësore në trajtimin e 36-vjeçares, në një rast që përfundoi me humbjen e jetës së saj.
