Gjykata e Korçës ka caktuar masën e sigurisë “arrest me burg” për Kristjan Sterjon, i dyshuar për vrasjen e Johan Zukos, 20 vjeç, me të cilin kishte qenë shok fëmijërie.
Sterjo u paraqit paraditen e së mërkurës në gjykatë nën masa të rrepta sigurie, ku u njoh me vendimin për masën e sigurisë. Gjatë seancës ai është shfaqur i qetë, ndërsa në përfundim ka shprehur pendesë për krimin.
“Jam penduar për atë që kam bërë”, mësohet të ketë deklaruar ai.
Nga dëshmia e Sterjos dhe hetimet paraprake rezulton se konflikti mes dy të rinjve kishte nisur disa ditë para ngjarjes dhe ishte përshkallëzuar pas disa episodeve të mëparshme.
Një prej shkaqeve që po hetohet lidhet me pretendimin se 20-vjeçari kishte ngacmuar të dashurën e Sterjos. Megjithatë, hetuesit po verifikojnë edhe konfliktet e mëparshme mes tyre, pasi dyshohet se të rinjtë kishin pasur debate, sharje dhe provokime të vazhdueshme.
Sipas të dhënave të deritanishme, përplasja mes tyre ishte kthyer në një konflikt të vazhdueshëm, ku dyshohet se ndikuan edhe pretendimet për dominim në lagje.
Në ditën e ngjarjes, sipas dëshmisë së tij, Sterjo ka marrë armën dhe ka ndjekur Zukon. Më pas e ka qëlluar me një plumb pas shpine, duke i shkaktuar plagë që rezultuan fatale.
Hetimet vijojnë për të zbardhur të gjitha rrethanat dhe motivet që çuan në përshkallëzimin e konfliktit mes dy të rinjve.
