Shoqëria shtetërore Operatori i Shërbimeve të Integruara të Sterilizimit (OSHIS) do të marrë në administrim edhe dy prej shërbimeve më të rëndësishme të sistemit shëndetësor në vend, Programin e Kontrollit Mjekësor Bazë (Check-Up)dhe shërbimin e dializës.
Lajmi u bë publik nga ministrja e Shëndetësisë, Evis Sala, gjatë një vizite në ambientet e OSHIS, ku theksoi se vendimet e fundit të Këshillit të Ministrave synojnë të rrisin kontrollin, standardizimin dhe cilësinë e këtyre shërbimeve.
Sipas ministres, kalimi i Check-Up-it dhe dializës nën administrimin e OSHIS do të krijojë një operator publik më të fortë dhe do të garantojë standarde të njëjta në të gjithë vendin.
“Me vendimet e fundit të Këshillit të Ministrave, OSHIS do të administrojë edhe dy shërbime kombëtare me ndikim të drejtpërdrejtë te qytetarët, Check-Up dhe dializën. Kjo do të thotë më shumë standardizim, më shumë kontroll mbi cilësinë, më shumë eficiencë dhe mbi të gjitha më shumë siguri për pacientët”, deklaroi ministrja Sala.
Megjithatë, ky zhvillim ka rikthyer në vëmendje debatet mbi mënyrën se si po organizohen shërbimet publike në shëndetësi.
Në krye të OSHIS ndodhet Arisa Cane, e cila më herët ka punuar në Spitalin Amerikan, ndërsa ministrja Evis Sala ka qenë rektore e universitetit të lidhur me të njëjtin grup privat.
Kjo ka ngritur pikëpyetje nëse administrimi i këtyre shërbimeve përbën një rikthim real të tyre nën kontrollin e shtetit apo një ndryshim të modelit të menaxhimit, duke ruajtur ndikimin e ish-kuadrove të sektorit privat në institucionet publike.
Sterilizimi, një kontratë që mbetet në qendër të debatit
Diskutimet lidhen edhe me historikun e koncesionit të sterilizimit, një kontratë shumëvjeçare me vlerë rreth 100 milionë euro, e cila është hetuar nga drejtësia për dyshime mbi procedurat e dhënies dhe zbatimit të saj.
Pas përfundimit të kontratës me operatorin privat, qeveria krijoi në fund të vitit 2025 shoqërinë shtetërore OSHIS, e cila mori administrimin e këtij shërbimi.
Tashmë, me vendimin për të kaluar edhe Check-Up-in dhe dializën nën të njëjtën strukturë, OSHIS pritet të administrojë një pjesë të konsiderueshme të fondeve publike në sektorin e shëndetësisë.
Në të njëjtën kohë, në qendër të vëmendjes mbetet edhe fakti se grupi privat i lidhur me biznesmenin Klodian Allajbeuvijon të jetë i përfshirë në disa kontrata të rëndësishme në sektorin e shëndetësisë, ndërsa vëmendja tashmë është përqendruar te mënyra se si do të zhvillohen procedurat e ardhshme të prokurimit dhe kompanitë që do të përfitojnë fondet publike./ Publik Media
