Ministria e Drejtësisë ka dërguar pranë autoriteteve franceze dokumentacionin për ekstradimin e biznesmenit Ermal Beqiri, i arrestuar pak ditë më parë në Francë.
Sipas Prokurorisë së Posaçme, kërkesës për ekstradim i është bashkëngjitur edhe vendimi i Gjykatës së Posaçme për caktimin e masës së sigurisë “arrest në burg” ndaj Beqirit, i cili dyshohet për kryerjen e shtatë veprave penale.
Biznesmeni u ndalua nga autoritetet franceze pasi u kap duke drejtuar një avion privat në hapësirën ajrore pranë një centrali bërthamor, ngjarje që solli nisjen e procedurave hetimore.
Ndërkohë, SPAK ka kërkuar sekuestrimin e disa pasurive që dyshohet se kanë prejardhje kriminale dhe që ndodhen në Francë. Mes tyre janë llogari bankare me vlerë mbi 2 milionë euro, dy apartamente, një kështjellë në departamentin Oise me vlerë rreth 2.6 milionë euro, automjete dhe pasuri të tjera.
Autoritetet shqiptare pritet të vijojnë komunikimin me palën franceze për finalizimin e procedurave të ekstradimit.
