Franca është vendi i parë në Bashkimin Evropian që ka miratuar një ligj për kufizimin e aksesit në rrjetet sociale për fëmijët nën moshën 15 vjeç. Nisma u votua nga Parlamenti dhe tashmë pret shqyrtimin përfundimtar nga Këshilli Kushtetues, përpara se të hyjë në fuqi.
Projektligji u miratua në Asamblenë Kombëtare me 279 vota pro dhe 81 kundër, pasi kishte marrë më herët edhe mbështetjen e Senatit. Sipas dispozitave të reja, nga 1 shtatori të miturit nën 15 vjeç nuk do të mund të hapin llogari të reja në platformat e rrjeteve sociale, ndërsa llogaritë ekzistuese do të çaktivizohen duke nisur nga janari i vitit 2027.
Presidenti Emmanuel Macron e përshëndeti miratimin e ligjit, duke e cilësuar atë një hap të rëndësishëm për mbrojtjen e fëmijëve dhe adoleshentëve në hapësirën digjitale. Ai theksoi se Franca po vendos një standard të ri në Evropë për sigurinë e të miturve në internet.
Ministrja e Digjitalizimit, Anne Le Hénanff, deklaroi se platformat do të jenë përgjegjëse për verifikimin e moshës së përdoruesve, duke shtuar se teknologjia e nevojshme për këtë proces është tashmë e disponueshme. Sipas saj, sistemi do të garantojë edhe mbrojtjen e të dhënave personale gjatë verifikimit.
Ligji përjashton nga kufizimet platformat me qëllim edukativ dhe enciklopeditë online. Gjithashtu, ai nuk parashikon masa ndëshkuese ndaj fëmijëve apo prindërve.
Pjesë e paketës është edhe ndalimi i përdorimit të telefonave celularë në shkollat e mesme, një masë që synohet të zbatohet me nisjen e vitit të ri shkollor.
