Koncerti i Kanye West në Tiranë nuk solli përfitimet e pritshme për turizmin, por u kthye në një mundësi abuzimi për disa biznese, ndërsa qeveria nuk arriti të mbrojë konsumatorët.
Kështu u shpreh eksperti i turizmit Isa Krasniqi në studion e News24, teksa komentoi organizimin e koncertit të zhvilluar javën e kaluar në kryeqytet.
Sipas tij, evente të tilla janë të nevojshme për vendin dhe sollën mijëra vizitorë, por problem mbetet mënyra se si u menaxhua akomodimi. Krasniqi deklaroi se rritja ekstreme e çmimeve të hoteleve dëmtoi imazhin turistik të Shqipërisë.
“Festivale të tilla i duhen vendit. 25 mijë të huaj erdhën për festivalin, por dolën të pakënaqur për akomodimin. Hotel me 3 yje me 3500 euro. Nëse abuzojmë, do të shkojmë edhe një herë në zemër. U bë një abuzim spektakolar. Mu bllokua i gjithë sistemi i akomodimit dhe të gjithë u ankuan. Nuk abuzoi Durrësi, por Tirana”, tha ai.
Eksperti theksoi se koncerti nuk mund të konsiderohet një dështim, por mënyra e menaxhimit dhe mungesa e kontrollit ndaj çmimeve krijuan pasoja negative për sektorin.
“Rëndësi ka çfarë fitoi Shqipëria dhe ne fituam një imazh të keq. Çmimet e hoteleve shkuan deri në 10-fish më shtrenjtë. Ky ishte një autogol për turizmin. Nëse nuk mbrojmë konsumatorin, do të jemi humbësit më të mëdhenj”, u shpreh Krasniqi
