Resortet e oligrakëve dhe investitorëve strategjikë në breg të detit Jon, nga Palasa në Himarë, po vijojnë të gllabërojnë para’ publike, megjithëse u trumbetua me të madhe se “janë investime private”.
Nga njëra anë investitorët strategjikë kanë përfituar qindra mijëra metra katrorë falas në breg të detit, iu janë falur taksat për 10 vite, ndërkohë që ky shteti jonë që mezi paguan pensionistët dhe ka pagat më të ulta në rajon e Europë, po financon edhe vepra të mëdha publike.
Pas ndërtimit të ujësjellësave që kushtuan mbi 25 milionë euro, por që vijojnë edhe sot të ndërtohen, qeveria ka urdhëruar me shpejtësi edhe ndërtimin e impianteve të ujërave të zeza, për t’u hequr jashtëqitjen këtyre oligarkëve apo sojit të tyre, që sërish barra u takon shqiptarëve të varfër.
Një faturë prej 14.4 milionë euro është gati të nënshkruhet nga qeveria për të ndërtuar një impiant në zonën e Dhërmiut, atje ku kanë ngritur resorte oligarkë dhe investitorë strategjikë, që gjithmonë e gjejnë zgjidhjen te qeveria.
Nëse nga ana tjetër qytete të tëra “notojnë” në ujëra të zeza, duke futur këtu Durrësin e Tiranën, të cilat në këto ditë të nxehta vere kundërmojnë erë të keqe dhe janë burim epidemish, qeveria jonë nuk merr masa për t’u hequr ujërat e zeza, por vendos që të investojë në atë vend, që dikur ua fali.
Në zonën e Dhërmiut kanë ngritur resorte një mori biznesmenësh, që nga Artan Gaçi, Ilir Trebicka, ka pasur projekt edhe aktori Gaz Paja, apo kanë marrë leje firma Gjikuria apo bashkëshorti i moderatores Alketa Vejsiu, biznesmeni Ardian Nelo.
Investimet llogariten në qindra miliona euro, ndërkohë që me sy të lirë duket se e gjithë zona është bërë një gurore e madhe, me kantiere të panumërta që kanë shkatërruar gjithçka.
Sipas dokumenteve që disponon Vox News, Shoqëria Rajonale e Ujësjellës Kanalizime Vlore ka hapur tenderin me vlerë 1.129.210.978 lekë, ose rreth 14.4 mln euro. Objekti është KUZ Dhërmi, ndërkohë që deri me tani nuk janë bërë publike se çfarë do të ndërtohet në atë zonë apo cilat resorte prek.
Vox News ka raportuar në vijimësi për projektet e shumta të qeverisë shqiptare për të investuar në zonat bregdetare, që lagen nga uji i detit Jon.
Madje, ironia e fatit në një nga këto procedura ka qenë se një firmë e shpallur disa herë si investitore strategjike, ka fituar tenderin për ndërtimin e ujësjellësit për investimet strategjike të bregdetin e jugut të Shqipërisë. Fillimisht “Gjikuria” mori statusin e investitorit dhe më vonë gllabëroi miliona euro nga tenderët.
Tashmë të gjithë kanë “sytë” nga tenderi i majmë për impiantin e ujërave të zeza, nëse do të fitohet ose jo nga një investitor në zonë apo gara do të hapet dhe do të marrin pjesë firma të tjera.
Fakti është se, sërish një impiant me vlerë dhjetëra miliona euro, po ndërtohet me taksat e shqiptarëve. Dhe, me shumë mundësi ky projekt s’do të jetë i fundit, pasi e gjithë vëmendja e pushtetarëve është kthyer nga ajo zonë, ndoshta për akses dhe lehtësira në banesat e dyta, të treta apo në hotelet që kanë në pronësi apo indirekte. /Voxnews/
