Një tjetër procedurë prokurimi në Bashkinë Lezhë ka ngritur pikëpyetje serioze mbi mënyrën se si është zhvilluar gara, pasi dokumentet e tenderit tregojnë se janë skualifikuar të gjithë operatorët konkurrues, përfshirë edhe ofertën me vlerën më të ulët, duke lënë në fund si fitues vetëm kompaninë “DRINI A” sh.p.k.
Bëhet fjalë për tenderin me objekt “Blerje materiale për mirëmbajtjen e godinave të institucioneve dhe godinave arsimore në administrim të Bashkisë Lezhë”, me fond limit 26.071.919 lekë pa TVSH, financuar nga buxheti i Bashkisë Lezhë.
Në garë morën pjesë vetëm tre operatorë ekonomikë: “DRINI A” sh.p.k., “STELLA” sh.p.k. dhe “ARJAN – A” sh.p.k. Megjithatë, në përfundim të procedurës, të dy operatorët konkurrues u skualifikuan, ndërsa fitues u shpall “DRINI A”, me ofertë 22.150.475 lekë pa TVSH.
Dokumentet e procedurës tregojnë se konkurrenca u eliminua plotësisht, duke krijuar një situatë ku vetëm një operator mbeti në garë për të marrë kontratën publike. Edhe më shqetësues është fakti se mes operatorëve të skualifikuar ndodhej edhe oferta me vlerën më të ulët, çka ngre dyshime të forta mbi kriteret e përdorura për eliminimin e saj.
Kur në një tender skualifikohen të gjithë konkurrentët dhe mbetet vetëm fituesi, lind detyrimisht dyshimi nëse procedura është zhvilluar në frymën e konkurrencës së lirë apo në funksion të paracaktimit të fituesit.
Ky rast kërkon verifikim të plotë nga institucionet përgjegjëse për të sqaruar nëse skualifikimet janë bërë mbi baza ligjore dhe objektive apo nëse kemi të bëjmë me një procedurë që ka kufizuar konkurrencën dhe ka favorizuar një operator ekonomik të caktuar.
Në një kohë kur fondet publike duhet të administrohen me transparencë maksimale, çdo procedurë ku eliminohen të gjithë konkurrentët përveç fituesit përbën një alarm serioz dhe meriton hetim administrativ e ligjor./TIMONI.AL
