NGA ETLEVA MERKO
Dy realitete komplet të kundërta.
Nga njëra anë është sheshi i realitetit, i qytetarëve që çdo ditë flasin për problemet e vërteta: arsimin, shëndetësinë, mungesën e meritokracisë, pagat, pensionet dhe koston e jetesës.
Nga ana tjetër është show i pushtetit, spektakli algoritmik që sot po i kthehet në bumerang atij që vetë e ndërtoi vite më parë.
Unë jetoj në Shqipëri. Punoj çdo ditë, paguaj çdo taksë dhe, megjithëse kam një pagë që konsiderohet e mirë, në fund të muajit mezi ia dal.
Atëherë si ia del pensionisti?
Si ia del familja me fëmijë?
Si ia del studenti?
Ndërsa qytetarët përballen me këto shqetësime, ju na ftoni të shohim koncerte dhe spektakle. Askush nuk është kundër artit apo kulturës. Por kur qytetarët mezi përballojnë jetesën, është e natyrshme të shtrohet pyetja nëse prioritetet e investimeve publike po adresojnë nevojat më urgjente.
Kjo nuk është ajo që shumë qytetarë presin nga një qeverisje e përgjegjshme. Shqipëria ka nevojë për investime në arsim, shëndetësi, mirëqenie dhe mundësi për njerëzit, jo vetëm për fasadë dhe spektakël.
Nuk mund të mbuloni realitetin me një show.
Problemet nuk zhduken nga dritat e skenës.
Zëri i qytetarëve është më i fortë se çdo algoritëm.
#Dorëheqje!
