Zbardhen detaje të reja nga hetimet për vrasjen e dyshuar të Eglant Koçit, ku autoritetet dyshojnë se ngjarja është kryer nga miku i tij, Armand Shakaj, ndërsa më pas është tentuar fshehja e trupit në zonën e majës së Korrës.
Sipas informacioneve të publikuara nga mediat, pas shoqërimit në komisariat, i dyshuari është përballur me familjarë dhe të afërm të viktimës, të cilët e kanë pyetur mbi lidhjen e tij me ngjarjen dhe praninë në polici. Ai fillimisht është justifikuar duke pretenduar se ishte marrë në pyetje vetëm si person që kishte dijeni për zhdukjen e Eglantit, duke shtuar se kishte komunikuar me të ditën kur humbi kontakti.
Në një moment tjetër, i dyshuari ka shkuar deri aty sa u ka kërkuar familjarëve ta kontaktonin nëse viktima do të gjendej, duke u shfaqur i shqetësuar për fatin e tij, sipas raportimeve.
Hetimet ndërkohë kanë avancuar me shpejtësi, pas sekuestrimit të kamerave të sigurisë dhe analizimit të tyre, që kanë ndihmuar në identifikimin e të dyshuarit brenda 24 orëve. Autoritetet kanë përdorur gjithashtu pajisje për gjurmimin e sinjalit të telefonit, duke ngushtuar zonat ku dyshohet se është lëvizur aparati celular i viktimës.
Po ashtu, janë marrë në pyetje banorë të zonës dhe një bari, i cili ka deklaruar se ka parë automjetin e të dyshuarit në zonën ku dyshohet se është fshehur trupi i pajetë.
