Prokuroria pranë Gjykatës së Shkallës së Parë të Juridiksionit të Përgjithshëm Sarandë ka përfunduar hetimet dhe ka dërguar në gjyq 16 persona të akuzuar kryesisht për veprën penale “Prodhim dhe shitje narkotikësh”, parashikuar nga neni 283 i Kodit Penal.
Sipas organit të akuzës, në kuadër të procedimit penal nr. 647, pas një hetimi njëvjeçar të zhvilluar me metoda proaktive, vëzhgime dhe përgjime, u dokumentua aktiviteti i një grupi personash që shpërndanin lëndë narkotike në qytetet e Sarandës dhe Delvinës, kryesisht te të rinjtë.
Hetimet janë drejtuar nga prokurorja Esmeranda Basho, nën drejtimin e së cilës është ndërtuar dosja hetimore që çoi në identifikimin dhe marrjen si të pandehur të 16 personave. Burime nga organi i akuzës bëjnë me dije se hetimi është mbështetur në prova të siguruara përmes teknikave speciale të hetimit, duke dokumentuar raste të përsëritura të shitjes së lëndëve narkotike.
Nga hetimet rezultoi gjithashtu se tre prej të pandehurve akuzohen edhe për veprën penale “Drejtimi i automjeteve në mënyrë të parregullt”, pasi u konstatuan nën efektin e lëndëve narkotike në momentin e ndalimit nga policia.
Mes personave të dërguar në gjyq janë J.I., M.H., P.B., E.H., M.D., O.A., F.A., Xh.M., S.M., D.Q., E.T., A.C., E.D., V.K., E.A. dhe A.Ç., të akuzuar për vepra të ndryshme që lidhen me narkotikët, armëmbajtjen pa leje dhe drejtimin e automjeteve nën efektin e lëndëve narkotike.
Ky procedim konsiderohet një nga hetimet më të gjera të ndërmarra nga Prokuroria e Sarandës kundër shpërndarjes së lëndëve narkotike në zonën jugore të vendit, me fokus të veçantë mbrojtjen e të rinjve nga fenomeni i përdorimit dhe shitjes së drogës.
Prokuroria e Sarandës ka theksuar se mbetet e angazhuar për të hetuar dhe ndjekur penalisht të gjithë personat e përfshirë në veprimtari të kundërligjshme që lidhen me prodhimin dhe shpërndarjen e lëndëve narkotike.
