Prokuroria e Posaçme ka goditur një grup të strukturuar kriminal në zonën e Kamzës. Bëhet fjalë pë grupin e drejtuar nga dy vëllezërit Abedin dhe Luciano Koçeku, të cilën drejtonin aktivitetin në fushën e trafikut të drogës dhe pastrimit të parave.
Sipas të dhënave të regjistruara në Qendrën Kombëtare të Biznesit, Koçeku zotëron tërësisht kompaninë “G.A.V Invest”, e themeluar në vitin 2022, me objekt veprimtarie në fushën e ndërtimit, projektimit dhe investimeve në komplekse rezidenciale, turistike dhe industriale.
Emri i tij shfaqet gjithashtu në sektorin energjetik. Ai rezulton aksioner në kompaninë “Ballenja Kompani”, e cila ka përfituar koncesionin për ndërtimin dhe shfrytëzimin e hidrocentralit “Ballenjë” në Bulqizë. Në këtë shoqëri, Koçeku ka pasur edhe rol administrativ së bashku me ortakë të tjerë.
Përveç kësaj, ai figuron me pjesëmarrje aksionare edhe në kompaninë “SGD Energji”, e angazhuar në prodhimin dhe tregtimin e energjisë elektrike.
