Gjykata Penale e Tiranës ka caktuar masën e sigurisë “arrest me burg” për Enea Zyferin, kamarier në lokalin në pronësi të Armand Shakajt, i shpallur në kërkim në kuadër të hetimeve për zhdukjen e Eglant Koçit.
Zyferi akuzohet për veprën penale të “përkrahjes së autorit të krimit”, ndërsa gjatë seancës gjyqësore ai ka mohuar çdo përfshirje në ngjarje dhe ka deklaruar se nuk ka lidhje me çështjen që po hetohet.
Burime pranë grupit hetimor bëjnë me dije se nga veprimet e deritanishme hetimore, provat shkencore dhe ato rrethanore, janë ngritur dyshime të forta se 35-vjeçari Eglant Koçi, i zhdukur prej 5 qershorit, mund të ketë humbur jetën.
Ndërkohë, hetimet vijojnë për zbardhjen e plotë të fatit të Koçit dhe për identifikimin e personave të përfshirë në ngjarje. Armand Shakaj mbetet në kërkim nga autoritetet.
