Që prej pandemisë, Shqipëria kryesoi Europën për rritjen e lartë të netqëndrimeve të turistëve, teksa ajo u bë një destinacion në lulëzim turistik.
Por, të dhënat e fundit të publikuara nga Eurostat për tremujorin e parë të këtij viti tregojnë se Shqipëria e ka humbur këtë “kurorë”, megjithatë mbetet sërish ndër vendet me rritjen më të shpejtë.
Sipas Eurostat, për tremujorin e parë, netqëndrimet në Shqipëri, si të turistëve të brendshëm ashtu dhe atyre ndërkombëtarë u rritën me 11.2%, duke u ngadalësuar ndjeshëm në krahasim me zgjerimin prej 30% që u shënua në 2025-n, me një diferencë të lartë me vendet e tjera.
Gjithsesi, Shqipëria vijon të jetë ndër vendet me rritjen më të lartë, duke qenë e dyta pas Irlandës, që ka marrë kurorën këtë vit me 35.3%. Në rajon, Mali i Zi ka tendencë negative (-2.4%), po ashtu dhe Kosova (-3.9%), ndërsa ecuri më pozitive ka parë Serbia (6.5%).
Sipas Eurostat, netqëndrimet e turistëve vendas në Shqipëri u rritën me ritme më të shpejta se të atyre të huaj, përkatësisht 14.1 dhe 9.6%.
Europa, rritje 3.4%
Në tremujorin e parë të vitit 2026, në strukturat akomoduese turistike në BE u regjistruan 471.1 milionë netqëndrime, me rritje 3.4% krahasuar me të njëjtën periudhë të vitit 2025. Janari regjistroi 143.5 milionë netqëndrime, me rritje 3.2% ndaj janarit 2025; shkurti 154.4 milionë, me rritje 3.4%; ndërsa marsi 173.2 milionë, me rritje 3.7%.
Në nivel vendesh, Irlanda shënoi rritjen më të lartë të netqëndrimeve në strukturat akomoduese turistike në tremujorin e parë, me 35.3%, e ndjekur nga Malta me 11.1% dhe Danimarka me 9.3%.
Ndër 9 vendet e BE-së që regjistruan rënie të netqëndrimeve, Lituania pati tkurrjen më të madhe, me -12.9%, e ndjekur nga Rumania me -6.7% dhe Luksemburgu me -3.8%.
Vizitorët e huaj përbënin rreth 46.6% të të gjitha netqëndrimeve në tre muajt e parë të vitit 2026, me dallime të mëdha mes vendeve të BE-së.
Peshën më të lartë të netqëndrimeve nga vizitorët e huaj gjatë kësaj periudhe e regjistruan Malta me 93.3%, Qipro me 85.6% dhe Luksemburgu me 85.1%.
Në të kundërt, vizitorët e huaj përbënin vetëm rreth një të pestën e netqëndrimeve në Gjermani me 19.9%, Poloni me 20.2% dhe Rumani me 22.4%.
Krahasuar me tremujorin e parë të vitit 2025, u rritën si netqëndrimet e vizitorëve të huaj, me 5.5%, ashtu edhe ato të vizitorëve vendas, me 1.7%.
Rritjet më të mëdha të netqëndrimeve nga vizitorët e huaj u regjistruan në Irlandë me 42.3%, Lituani me 24.1% dhe Sllovaki me 15.4%. Në kahun tjetër, rëniet më të forta të vizitorëve të huaj u shënuan në Letoni me -7.5%, Bullgari me -4.3% dhe Belgjikë me -4.0%./ Monitor
