Ish-zëvendëskomandanti i Forcës Detare shqiptare, Artur Meçollari, ka ngritur akuza të forta lidhur me procesin e dërgimit të çështjes së kufirit detar mes Shqipërisë dhe Greqisë në Gjykatën Ndërkombëtare të Drejtësisë.
Duke iu referuar marrëveshjes detare Shqipëri-Greqi të vitit 2009, e cila u rrëzua nga Gjykata Kushtetuese në vitin 2010, Meçollari pretendon se qeveria aktuale greke e drejtuar nga Kyriakos Mitsotakis synon të zhbëjë disa dakordësi të arritura gjatë negociatave të vitit 2018 mes dy vendeve.
Sipas tij, dy janë pikat kryesore ku qeveria greke nuk pajtohet me dakordësitë e negociuara nga qeveria e atëhershme e Alexis Tsipras:
- Vija e drejtë bazë e Shqipërisë – Meçollari deklaron se gjatë negociatave të vitit 2018, pala greke kishte njohur vijën e drejtë bazë të Shqipërisë, duke i dhënë vendit një efekt prej rreth 40 km² në ndarjen detare. Ai thekson se kjo çështje nuk është trajtuar në vendimin e Gjykatës Kushtetuese.
- Njohja e Protokollit të Firences të vitit 1925 – Sipas Meçollarit, edhe pse ky protokoll nuk ishte ratifikuar nga pala greke, ai ishte përfshirë si dakordësi në draftin e marrëveshjes së vitit 2018.
Më tej, ai akuzon qeverinë shqiptare dhe kryeministrin Edi Rama se me dakordësinë për ta çuar çështjen në Hagë, më 20 tetor 2020, po ndihmojnë qeverinë Mitsotakis në dëm të interesave të Shqipërisë.
Sipas Meçollarit, këtij qëllimi i shërben edhe emërimi i Ferit Hoxha, kryenegociatorit të marrëveshjes detare të vitit 2009, në postin e ministrit të Jashtëm.
