Një tjetër tender i dyshimtë ngre pikëpyetje të forta mbi mënyrën se si po administrohen fondet publike në Himarë. Nën hijen e “sistemimit të plazheve publike”, rezulton se gara është kthyer në një procedurë formale, ku konkurrenca është eliminuar dhe fituesi duket i paracaktuar që në fillim.
Bëhet fjalë për tenderin me objekt “Sistemimi i plazheve publike”, zhvilluar nga Ndermarrja e Sherbimeve Publike Himare, nën autoritetin e Qeverisja Vendore Himarë, me fond limit 4 156 998 lekë pa TVSH.
Në garë morën pjesë vetëm dy operatorë ekonomikë:
* ASI INVEST shpk
* KALIVIOTI shpk
Por ajo që ngre dyshime serioze është fakti se oferta më e ulët u skualifikua, ndërsa fitues u shpall kompania KALIVIOTI shpk me ofertë 4 072 850 lekë pa TVSH, shumë pranë fondit limit. Një skemë e njohur tashmë në tenderat publikë: hiq konkurrencën dhe shpall fituesin e preferuar.
Tenderi me numër reference REF-80648-04-01-2026 u hap më 2 prill 2026 dhe u mbyll më 14 prill 2026, po në të njëjtën datë kur u zhvillua edhe procedura. Vetëm dy operatorë në garë dhe në fund mbetet vetëm një “fitues”, ndërsa oferta më ekonomike hidhet poshtë. Pikërisht këtu nis hija e dyshimit për manipulim dhe favorizim.
Në çdo shtet normal, skualifikimi i ofertës më të ulët do të kërkonte transparencë maksimale dhe argumente të forta ligjore. Por në Shqipëri, sidomos në Himarë, tenderat po kthehen gjithnjë e më shumë në procedura të mbyllura ku fituesi duket se dihet para se të hapen zarfet.
Pyetja që shtrohet është e drejtpërdrejtë: pse u skualifikua operatori me ofertën më të ulët? Çfarë kriteresh “sekrete” nuk plotësoi? Dhe a kemi të bëjmë me një tjetër tender të qepur për klientë të paracaktuar?
Ky rast pritet të ndezë debat, ndërsa mbetet për t’u parë nëse institucionet e kontrollit dhe SPAK do të verifikojnë procedurën dhe arsyet reale të skualifikimit të konkurrencës në këtë tender për plazhet publike të Himarës./Timoni al
