Tre pika këmbimi valutor janë goditur nga policia e Tiranës pasi ishin pa licencë. Nën hetim u vunë pronarët si dhe u sekuestruan mijëra euro.
Më konkretisht, policia bën me dije se ka sekuestruar 45 000 euro, 7000 dollarë, 3000 paunde dhe 1 500 000 lekë në këto tre subjekte të këmbimit valutor, pasi rezultoi se nuk ishin të licencuara për këtë aktivitet.
“Për këto raste u referuan materialet në Prokurori, ku nisi procedimi penal për 3 pronarët e subjekteve në rrugët “Abdyl Frasheri”, “Sokrat Miho” dhe “Sulejman Delvina”, shtetasit O. L., 31 vjeç, E. P., 35 vjeçe dhe M. D., 40 vjeç.”, njofton policia.
Njoftimi i plotë:
Policia e Tiranës/Vijon zbatimi i planit të posaçëm të masave për goditjen e rasteve të ushtrimit të aktiviteteve ekonomike, në kundërshtim me ligjin.
Konstatohet se ne 3 subjekte kryhej këmbim valutor, pa licencë.
Dje, Policia e Tiranës, në zbatim të këtij plani, goditi dhe 2 raste në këtë fushë.
Vihen në hetim 3 pronarët e subjekteve.
Sekuestrohen 45 000 euro, 7000 dollarë, 3000 paunde dhe 1 500 000 lekë.
Specialistët e Seksionit për Hetimin e Pastrimit të Parave dhe Aseteve Kriminale, në vijim të kontrolleve të kryera në zbatim të planit të posaçëm të masave “Për goditjen e aktiviteteve të paligjshme”, evidentuan 3 raste të tjera të këmbimit të valutave, nga subjekte të palicencuara për këtë aktivitet.
Për këto raste u referuan materialet në Prokurori, ku nisi procedimi penal për 3 pronarët e subjekteve në rrugët “Abdyl Frasheri”, “Sokrat Miho” dhe “Sulejman Delvina”, shtetasit O. L., 31 vjeç, E. P., 35 vjeçe dhe M. D., 40 vjeç.
Kontrollet dhe verifikimet ndaj shtetasve dhe në subjekte, vijojnë.
Materialet procedurale iu referuan Prokurorisë së Tiranës, për veprime të mëtejshme.
