Instagram po teston një paketë të re me pagesë të quajtur “Instagram Plus”, e cila synon të sjellë funksione të avancuara për përdoruesit e zakonshëm, duke shënuar një hap të ri drejt monetizimit të platformës.
Sipas informacioneve, ky abonim nuk do të fokusohet te bizneset apo krijuesit e përmbajtjes, por te përdoruesit individualë. Ndër funksionet kryesore përfshihen një “modalitet i padukshëm” për shikimin e story-ve pa u identifikuar, si dhe një opsion që tregon se kush i ka parë dhe sa herë i ka rishikuar story-t.
Po ashtu, paketa parashikon zgjatjen e kohëzgjatjes së story-ve nga 24 në 48 orë, si dhe mundësinë për të promovuar një story në javë në krye të feed-it.
Ndryshime të tjera përfshijnë lista të pakufizuara “Close Friends”, kërkim më të detajuar të shikuesve të story-ve sipas emrit, si dhe opsion për të parë paraprakisht story pa u regjistruar si shikim. Përdoruesit mund të kenë edhe reagime të reja, përfshirë “Super Heart”.
Çmimi i abonimit pritet të variojë nga 1 deri në 3 dollarë në muaj, megjithëse Meta nuk ka bërë ende një konfirmim zyrtar. Instagram Plus, sipas informacioneve, do të jetë i disponueshëm vetëm për llogaritë personale.
Paralelisht, Meta ka sjellë edhe një tjetër risi në platformë, duke u dhënë përdoruesve mundësinë të editojnë komentet e tyre brenda 15 minutave nga publikimi. Opsioni funksionon në mënyrë të ngjashme me redaktimin e mesazheve direkte dhe lejon ndryshimin e përmbajtjes së komentit përpara konfirmimit të tij përfundimtar.
