Ish-kapiteni i Kombëtares shqiptare, Lorik Cana, është nderuar me titullin prestigjioz “Kalorës i Urdhrit të Skënderbeut”, akorduar nga Presidenti i Republikës, Bajram Begaj.
Vlerësimi për Canën u bë gjatë Samitit të Diasporës të mbajtur në Tiranë, në një ceremoni ku u nderuan personalitete me kontribut të veçantë në diasporë dhe përfaqësimin e shqiptarëve jashtë vendit.
Pas dekorimit, Cana u shfaq i emocionuar, duke theksuar se këtë vlerësim nuk e konsideron vetëm personal, por si një nder që i përket familjes së tij dhe rrënjëve të tij.
“Unë sot nuk e pranoj vetëm në emrin tim, por në emrin e familjes sime, babait tim Agimit, gjyshërve, dhe gjithë atyre që kanë qenë pjesë e historisë sonë,” u shpreh ai.
Ai theksoi gjithashtu rrugëtimin e shqiptarëve të Kosovës dhe diasporës, duke kujtuar emigrimin dhe përpjekjet për të ruajtur identitetin dhe për të përfaqësuar denjësisht shqiptarët në botë.
