E pranon vetë ministrja Sala
Ministrja e Shëndetësisë dhe Mbrojtjes Sociale, Evis Sala, ka pranuar se në QSUT, pas datës 20 prill, mund të ketë ndërprerje të kryerjes së analizave për pacientët e shtruar për shkak të mungesës së fondeve.
Gjatë një deklarate publike, ajo theksoi se situata është në proces vlerësimi dhe institucionet janë duke mbledhur të gjitha të dhënat e nevojshme për të adresuar problemin.
“Po bëjmë një analizë të plotë të situatës. I kemi të gjitha të dhënat dhe mbi bazën e tyre do të realizojmë një planifikim më të mirë të shërbimit. Analizat nuk duhet të mungojnë dhe kjo është një çështje që po e trajtojmë me prioritet, për ta zgjidhur brenda këtij viti,” u shpreh ministrja.
Deklarata ngre shqetësime mbi funksionimin e shërbimeve bazë spitalore, ndërsa pritet që autoritetet të ndërhyjnë për të garantuar vijimësinë e analizave për pacientët e shtruar në qendrën më të madhe spitalore në vend.
