Një shpërthim i fortë ka tronditur kryeqytetin italian, duke shkaktuar shembjen e dy pallateve dhe plagosjen e të paktën dy personave, në një ngjarje të rëndë që ndodhi mesditën e së dielës.
Ngjarja u regjistrua rreth orës 13:00 në zonën Piana del Sole, në jugperëndim të Romës, mes rrugëve Via Tavagnasco dhe Via Castellinaldo. Sipas të dhënave paraprake, shpërthimi dyshohet të jetë shkaktuar nga një bombol gazi GPL, megjithëse shkaqet e sakta ende nuk janë konfirmuar zyrtarisht.
Shpërthimi ka qenë aq i fuqishëm sa ka sjellë shembjen e plotë të dy pallateve, ndërsa disa të tjera përreth kanë pësuar dëme të konsiderueshme. Nga pamjet që qarkullojnë në rrjetet sociale, shihet struktura e shkatërruar e një ndërtese, ndërsa mbetjet kanë dëmtuar edhe automjete dhe kanë thyer xhamat e banesave pranë.
Raportohet se të paktën katër deri në pesë ndërtesa të tjera kanë pësuar dëme nga të lehta deri në të rënda.
Deri më tani janë konfirmuar dy persona të plagosur rëndë, të dy në moshë të thyer. Ata janë nxjerrë nga rrënojat dhe janë dërguar me urgjencë në spital në gjendje kritike.
“Pashë një grua të shtrirë në tokë duke u dridhur”, ka rrëfyer një dëshmitare nga vendngjarja.
Ndërkohë, ekipet e emergjencës vijojnë kërkimet për persona të tjerë që mund të kenë mbetur nën rrënoja, pasi ndërtesat rezultonin të banuara në momentin e shpërthimit.
Në vendngjarje ndodhen zjarrfikësit, ambulancat e shërbimit 118, policia dhe karabinierët. Në operacion janë angazhuar edhe njësi speciale për kërkim-shpëtim, përfshirë ekipet me qen të trajnuar për gjetjen e personave nën rrënoja.
Autoritetet bëjnë me dije se shpërthimi ka shkatërruar pothuajse të gjitha muret e ndërtesave, ndërsa forca e tij është ndjerë në të gjithë zonën përreth.
Hetimet vijojnë për të përcaktuar me saktësi shkaqet e shpërthimit, ndërsa pista kryesore mbetet ajo e një bombole gazi që mund të ketë shpërthyer brenda një prej banesave.
