Detaje të reja kanë dalë në dritë nga vrasja e 30-vjeçarit shqiptar Gjergj Pergegaj, në Itali, ku dyshohet se motivi lidhet me një konflikt për xhelozi.
Ngjarja u regjistrua rreth mesnatës mes 20 dhe 21 marsit, në zonën Olmo, pranë një klubi nate në Via Romana. Sipas mediave italiane, i riu ishte ndalur për të biseduar me ish-të dashurën e tij, kur në vendngjarje mbërriti partneri aktual i saj, një tjetër shtetas shqiptar 35-vjeçar.
Pas një përplasjeje të çastit, 35-vjeçari dyshohet se ka nxjerrë armën dhe ka qëlluar disa herë në drejtim të viktimës, duke e lënë të vdekur në vend.
Pas krimit, autori u largua, por rreth dy orë më vonë kontaktoi vetë policinë, duke kërkuar të dorëzohej dhe duke treguar vendndodhjen e tij. Ai u gjet në zonën e Rigutinos, ku u arrestua së bashku me armën e përdorur, e cila rezultoi pa leje.
