Tre tërmete janë regjistruar njëra pas tjetrës në orët e para të mëngjesit pranë kufirit mes Shqipërisë dhe Greqisë, duke shkaktuar shqetësim tek banorët e zonave përreth.
Sipas të dhënave sizmologjike, tërmeti i parë u regjistrua në 03:32 UTC (05:32 me orën lokale) me magnitudë 5.4 të shkallës Rihter. Epiqendra u lokalizua rreth 16 kilometra në perëndim të Eleousa dhe 155 kilometra në perëndim të qytetit të Larisës, në një thellësi prej 5 kilometrash.
Vetëm pak minuta më vonë, në 03:36 UTC, u regjistrua një tjetër tërmet me magnitudë 4.9, me epiqendër rreth 21 kilometra në jugperëndim të Ioanninës.
Ndërsa lëkundja e tretë u regjistrua në 03:39 UTC me magnitudë 3.6, rreth 20 kilometra në jugperëndim të Eleousa, gjithashtu në një thellësi prej 5 kilometrash.
Deri më tani nuk raportohen dëme materiale apo persona të lënduar, ndërsa autoritetet sizmologjike po monitorojnë situatën për lëkundje të mundshme pasuese.
