Një nga figurat e njohura të sipërmarrjes në veri të Italisë është vrarë në banesën e tij, ndërsa policia po heton disa pista për zbardhjen e plotë të ngjarjes.
Viktima është 87-vjeçari Mario Ruoso, biznesmen i njohur në Pordenone dhe themelues i televizionit lokal TelePordenone. Ai u gjet i pajetë në apartamentin e tij në Porcia, në katin e sipërm të një pallati në Via del Porto.
Sipas mediave italiane, 87-vjeçari është goditur disa herë në kokë, dyshohet me një objekt të fortë, ndoshta një levë.
Prokurori i Pordenones, Pietro Montrone, konfirmoi se bëhet fjalë për një vdekje të dhunshme dhe se hetimet po vazhdojnë për të verifikuar plotësisht rrethanat e krimit.
“Ai ka pësuar goditje në kokë të shkaktuara nga një objekt i fortë”, deklaroi ai për mediat. Arma e dyshuar e krimit nuk është gjetur ende.
Trupi i pajetë u zbulua nga nipi i tij, Alessandro, pasi kolegët e biznesmenit u shqetësuan kur ai nuk u paraqit në punë dhe nuk u përgjigjej telefonatave. Sipas një ekzaminimi paraprak të kryer nga mjeku ligjor Antonello Cirnelli, vdekja dyshohet se ka ndodhur në orët e mëngjesit. Viktima u gjet e shtrirë në dysheme, pranë derës së banesës, e mbuluar me gjak.
Hetuesit kanë sekuestruar pamje nga kamerat e sigurisë të bizneseve përreth dhe kanë marrë në pyetje disa dëshmitarë.
Mario Ruoso njihej si një nga sipërmarrësit historikë të zonës së Friuli Venezia Giulia. Përveç aktivitetit në tregtinë e automjeteve përmes koncesionarit të tij, ai ishte edhe themelues i një prej televizioneve të para lokale në rajon. Deri më tani pistat e hetimit janë për larje hesapesh hde motive hakmarrje, megjithatë hetimet për zbardhjen e plotë të vrasjes vijojnë.
