Durim Bami ka kërkuar ndryshim të vendit të vuajtjes së paraburgimit vetëm një ditë pasi u ekstradua nga Dubai drejt Shqipërisë.
Përmes një shkrese drejtuar Drejtorisë së Përgjithshme të Burgjeve, mbrojtja e tij kërkon që ai të mos qëndrojë në IEVP “Jordan Misja” (i njohur si burgu “313”) në Tiranë, por të transferohet në burgun e Fushë-Krujës. Sipas avokatit, në ambientet aktuale i rrezikohet jeta.
Bami është nën hetim nga SPAK për veprat penale “Sigurim i kushteve dhe i mjeteve materiale për të kryer vrasje”, kryer në formën e grupit të strukturuar kriminal, si dhe “Grup i strukturuar kriminal”.
Në kërkesën e paraqitur, mbrojtja argumenton se në Gjykatën e Posaçme po zhvillohet proces penal ndaj disa grupeve të strukturuara kriminale, mes tyre të ashtuquajturat grupe “Martinaj”, “Avdylaj” dhe “Bajraj”, ku sipas SPAK, disa prej të pandehurve kanë kërkuar eliminimin fizik të Bamit.
Avokati pretendon se në burgun ku ai mbahet aktualisht ndodhen persona që në të kaluarën kanë siguruar kushte për vrasjen e tij, çka sipas tij e vendos në rrezik të drejtpërdrejtë.
Në të njëjtën shkresë thuhet se gjatë takimit të zhvilluar më 27 shkurt 2026 në ambientet e IEVP “Jordan Misja”, Bami paraqitet në gjendje jo të mirë shëndetësore, në stres të vazhdueshëm dhe i shqetësuar për sigurinë e tij.
