Nga Boldnews.al
Në Yzberisht, në periferinë e re urbane në perëndim të Tiranës, një rrugë është emërtuar “Panajot Pano”, në nder të legjendës së futbollit të Partizanit dhe Kombëtares Shqiptare.
Bashkia e kryeqytetit ka vendosur të shpenzojë rreth 1.3 milionë euro për ristrukturimin dhe rehabilitimin e kësaj rruge, si edhe të pesë rrugicave që lidhen në mënyrë integrake me atë.
Sipas Bashkisë, punimet për këto akse rrugore, në total rreth 760 metra linearë, “synojnë t’i shërbejë më shumë zonës, duke përqëndruar vëmendjen e shuimë aktiviteteve në këtë zonë dhe duke përmirësuar aksesueshmërinë në bllokun e pallateve të banimit”.
Megjithatë, një vëzhgim i kryer nga “Boldnews.al” në zonën, ku pritet të shpenzohen 1.3 milionë euro, tregon se pjesa më e madhe e rrugëve që do të rehabilitohen, në fakt janë sistemuar së fundmi nga procedura të tjera prokurimi të zhvilluara nga Bashkia e Tiranës.
Faturë e fryrë?
Në 11 Shkurt 2026, Bashkia e kryeqytetit shpalli tenderin me objekt “Rehabilitimi i rrugëve të bllokut që kufizohet nga rrugët “3 Dëshmorët” – “Kadri Roshi” dhe “Panajot Pano”, me fond limit 103.514.700 lekë të reja. Ofertat priten deri në datë 2 mars të këtij viti.
Projekti teknik është hartuar nga studio “A&E Engineering”, e drejtuar nga arkitektja Entela Çano, e marrë e pandehur pak javë më parë nga Prokuroria e Posaçme, SPAK, për tendera të dyshimtë në bashkinë e Kolonjës.
Në projektin e porositur nga Bashkia e Tiranës, thuhet se “Gjatësia e segmentit rrugor është afërsisht 764 m. Rehabilitimi i rrugeve të bllokut që kufizohet nga rrugët “3 Deshmorët” – “Kadri Roshi” dhe “Panajot Pano” propozon rehabilitimin e 6 akseve rrugore, me të gjithë elementët e infrastrukturës rrugore. Është projektuar një aks kryesor, aksi 1, nëpërmjet të cilit lidhen dhe akset e tjera, përkatësisht aksi 2, 3, 4, 5 dhe 6.”
“Boldnews.al” shqyrtoi dokumentat e procedurës dhe kreu një verifikim në terren. Nga të dhënat e përftuara konstatohen diferenca të konsiderueshme mes asaj që shfaqet problematike në letrat e procedurës dhe gjendjes reale të akseve rrugore.
Në vijim, është një krahasim vizual, mbi bazën e të cilit ngrihen dyshime se fatura financiare për këtë tender është e fryrë, në, më së paku, 50 përqind.
Aksi 1-Panajot Pano
Në dokumentat e tenderit, rruga kryesor që pritet të rehabilitohet, është aksi 1, rruga “Panajot Pano.
Në Raportin Teknik, të përgatitur nga “A&E Engineering”, thuhet: “Rruga ‘Panajot Pano’: ky segment fillon nga rruga “3 Dëshmorët” dhe përfundon në rrugën ‘Kadri Rroshi’. Ky segment ka një gjerësi 5 – 8m, është totalisht i pasistemuar (pa shtresa asfaltike, pa trotuare, pa rrjet inxhinierik, pa rrjet ndriçimi dhe gjelbërim).
Pra, referuar tekstit, kuptohet qartësisht se aksi “Panajot Pano” ka vetëm emërtimin rrugë, pasi nuk ka asnjë element që e bën atë “rrugë”.
Por, “Boldnews.al” konstatoi se aksi “Panajot Pano”, jo vetëm që është i sistemuar, por madje ai është shumë më i mirë se shumë rrugë të tjera në Tiranë. Trotuaret janë të gjera, ka rrugica për biçikleta, aksi rrugor lejon kalimin e dy automjeteve në kahe të kundërta dhe në të dy anët ka akses për parkim, ndërkohë që në të gjithë gjatësinë e tij ka gjelbërim.
Në vijim, shohim akset e tjera, të emërtuara 1, 2, 3, 4, 5, 6
Aksi 2, është rrugica e parë në projekt. Sipas projektit të Bashkisë, ky aks ka nevojë për ndërhyrje, për të rritur aksesueshmërinë e banorëve dhe bizneseve.
Në pamjet e fotografuara nga “Boldnews.al” konstatohet se ky aks është rrugë me një kalim, e asfaltuar dhe me trotuare të gjera për banorët. Me sy të lirë konstatohet se nuk ka asnjë lloj emergjence për ndërhyrje, madje është në kushte optimale, shumë më të mira se në shumë zona të tjera të Tiranës.
Aksi 3 i projektit të Bashkisë së Tiranës gjithashtu sugjerohet për ndërhyrje rehabilituese.
Në foton e realizuar nga “Boldnews.al” dallohet qartësisht se edhe ky aks nuk duket se ka nevojë për ndërhyrje të thelluar rehabilituese. Është një aks rrugor me një sens, ka trotuare, gjelbërim dhe poste parkimi në të gjithë gjatësinë e tij në të dy anët e rrugës.
Aksi 4 i projektit të Bashkisë së Tiranës dallohet qartësisht se ka nëvojë për ndërhyrje të thellë rehabilituese.
Aksi është tërësisht i paasfaltuar, trotuaret janë jo-funksionale. Megjithatë, zgjerimi dhe rehabilitimi i këtij aksi duhet parë në vijim se si do të zgjidhet nga ana teknike, pasi ai, në pjesën ballore, ka një hapësirë shumë të limituar, për shkak të afërsisë mes dy pallateve, të cilët ndahen nga njëri-tjetri nga vetëm 4-5 metra. Gjatësia e këtij aksi është rreth 70-80 metra linearë.
Aksi 5 i projektit të Bashkisë së Tiranës ka gjithashtu nevojë për ndërhyrje rehabilituese.
Edhe këtu dallohen se asfalti nuk ekziston, trotuaret janë jo-funksionale dhe parkimi i automjeteve është kaotik. Ndryshe nga aksi 4, ky aks mund të ketë zgjidhje të lehtë kalimi në të dy anët, pasi hapësira mes pallateve është e mjaftueshme për të kryer punime cilësore. Gjatësia e këtij aksi është maksimalisht 100 metra linearë.
Aksi 6 i projektit të Bashkisë së Tiranës është në gjendje shumë më të pranueshme se dy akset pararendës.
Në vend të asfaltit të shtruar ka pllaka asfaltike, të cilat krijojnë lirshmëri në lëvizjen e automjeteve. Ka një rrëmujë në mënyrën e parkimit (në dy senset e lëvizjes), ndërkohë që është me një sens lëvizjeje. Kjo është një problematikë që mund të zgjidhet me vendosjen e tabelave të qarkullimit. Megjithatë, mund të vlerësohet se ka nevojë për ndërhyrje rehabilituese. Gjatësia e këtij aksi është rreth 90 metra linearë.
Nga vëzhgimi në terren, duket se nga 6 akset e përfshira në rehabilitim, me një gjatësi totale prej 760 metra linearë, vetëm tre prej tyre, me gjatësi të përgjithshme rreth 300 metra linearë, kanë nevojë për ndërhyrje. Një situatë që ngre dyshime se fatura financiare prej 1.3 milionë euro, më së paku është dyfishuar.
Akse rrugore fiktive?
Vëzhgimi në terren nga “Boldnews.al” krijon dyshime se në tenderin 1.3 milionë euro të shpallur së fundmi nga Bashkia e Tiranës janë shtuar në mënyrë fiktive disa akse rrugore që nuk i përkasin zonës së projektuar, me qëllim fryrjen e faturës financiare.
E nisim me rrugën “Panajot Pano”, e cila, sipas projektit më të fundit të Bashkisë së kryeqytetit, përbën edhe pjesën më të madhe të investimit, pasi është rreth 300 metra linearë e gjatë.
Siç u konstatua më lart, rruga “Panajot Pano”, e emërtuar “Aksi 1”, është në gjendje optimale.
Në fakt, ky aks rrugor është rehabilituar në një tender të zhvilluar nga Bashkia e Tiranës në dhjetor të vitit 2022.
Ky aks rrugor ka qenë pjesë e një procedure me vlerë 1.6 milionë euro dhe me objekt “Rikualifikimi urban i bllokut të kufizuar nga rrugët 3 Dëshmorët-Rexhep Shala- Joakim Persi”.
Fotoja më lart tregon rrugën “Panajot Pano” si pjesë e tenderit rehabilitues të vitit 2022. Edhe në atë procedurë, sipas një vëzhgimi të kryer në atë kohë nga redaksia, rezultonte se gjendja reale e atij aksi rrugor nuk ishte në atë situatë “katastrofike”.
Megjithatë, rruga “Panajot Pano” iu nënshtrua rehabilitimit dhe tashmë është sistemuar plotësisht.
I rikthehemi sërish tenderit të shpallur së fundmi. Në dokumentat e procedurës janë vendosur edhe disa fotot, me qëllim për të argumentuar nevojën rehabilituese.
Mes fotove, tërheq vëmendjen pamja e rrethuar në rreth të kuq më lart. Sipas projektit të Bashkisë së Tiranës, ky aks rrugor ka nevojë për ndërhyrje rehabilituese, në kuadër të tenderit Rehabilitimi i rrugëve të bllokut që kufizohet nga rrugët “3 Dëshmorët” – “Kadri Roshi” dhe “Panajot Pano”, të shpallur në shkurt 2026.
Në realitet, përfshirja e këtij aks rrugor duket se është fiktive, pasi (1) nuk i përket aspak këtij blloku; (2) në realitet, nuk është në këtë gjendje siç tregohet në fotot e projektit dhe (3), ai aks rrugor është rehabilituar plotësisht me tenderin 1.6 milionë euro të zhvilluar nga Bashkia e Tiranës në vitin 2022.
Bashkia e Tiranës, e drejtuar nga kryetarja e komanduar, Anuela Ristani, tashmë është në pritje të ofertave nga kompanitë private për tenderin 1.3 milionë euro, i cili duket se ka një faturë të fryrë në rrethj 50 përqind të saj.
