Deputeti i Partisë Socialiste Erion Braçe ka paralajmëruar padi penale ndaj Drejtorisë së Tatimeve dhe çdo institucioni tjetër që nuk respekton afatet kohore për kthimin e përgjigjeve.
Braçe kritikoi institucionet dhe Kuvendin kur tha se i japin rëndësi çështjeve jashtë rendit të ditës, ndërsa ato më të rëndësishmet, kanë kohë të limituar.
“Më 2 shkurt kam depozituar kërkesë për seancë pyetje përgjigje me ministren e Arsimit. Javës tjetër është javë e gjelbër, bëhen më shumë se 4 javë nga kërkesa. Shoh që ministrja është këtu dhe kuptoj që është problem i Parlamentit. Shkolla “Edit Durham” edhe pse është mbaruar, nuk është në funksion. Shpërdorohet koha për çështje jashtë rendit të ditës, dhe për çështje të rëndësishme koha është me racion.
Afati maksimal që ma jep Rregullorja është 3 javë, jo 4. 1700 nxënës shkojnë automatikisht në turnin e dytë. Kontrolli parlamentar nuk përdoret dot me racion. Kam mnjë seri kërkesash për marrje informacioni. Është ezauruar çdo afat me Tatimet dhe AKU, do shkojmë drejt një kallëzimi penal për të marrë informacion”, deklaroi Braçe nga Kuvendi.
