Kontrolli i Lartë i Shtetit (KLSH) thotë se mbi 31 mijë shishe ujë i ambalazhuar me aromë shumë të keqe është shitur në tregun vendas, ndërkohë që Autoriteti Kombëtar i Ushqimit (AKU) nuk mori asnjë masë ndaj një kompanie private, megjithëse nga analizat kishte rezultuar se produkti ishte me cilësi tërësisht jashtë standardit dhe i rrezikshëm për konsumatorët.
KLSH i referohet specifikisht një rasti të denoncuar publikisht në media dhe rrjete sociale, në vjeshtën e vitit 2024. Audituesit shtetërorë kanë konstatuar se, për këtë rast, AKU nuk ka marrë asnjë masë të nevojshme, ndryshe nga një rast i ngjashëm, kur ndaj subjektit privat u aplikuan sanksionet ligjore.
“Kjo nxjerr në pah trajtimin me standarde të dyfishta nga AKU dhe drejtoritë rajonale për raste të ngjashme”, thuhët në Raportin e Auditit të Performancës “Cilësia dhe çertifikimi i ujit të pijshëm që hidhet në treg për qytetarin”.
Në raportin e Kontrollit të Lartë të Shtetit nuk është specifikuar kompania që ka hedhur në treg ujë të ambalazhuar jashtë cilësisë dhe, për të cilën, Autoriteti Kombëtar i Ushqimit është treguar shumë “tolerant”, në shkelje të ligjit dhe shëndetit të qytetarëve.
Megjithatë, “Boldnews.al” kreu një verifikim në burime të hapura, kryesisht në rrjete sociale, nga ku rezultoi se në Shtator 2024 (pra, në kohën që referon KLSH), ka pasur denoncime të shumta nga ana e qytetarëve për ujë të ambalazhuar me aromë shumë të keqe, të hedhur në treg nga subjekti “Lajthiza Invest”.
Kompania është në pronësi të Lavdije Elezaj, bashkëshortja e sipërmarrësit Hajri Elezaj.
Çfarë thotë KLSH?
Pas denoncimeve nga konsumatorët në muajin shtator për aromë të rëndë të ujit të ambalazhuar në formatin 5 litra, AKU ndërmori një kontroll të menjëhershëm në subjektin prodhues, në magazinat qëndrore dhe në pikat e shitjes.
“Në vijim, më 27.11.2024, një mostër e ujit natyral e marrë nga një subjekt shitës u analizua nga laboratori i Drejtorisë Rajonale të AKU Durrës (DRAKU Durrës) dhe rezultoi jo konform. Kjo sipas raport provës nr. 328/578, për shkak të aromës së rëndë dhe shijes jo karakteristike për ujë të pijshëm, pra mos konformitet për treguesit organo-shqisorë”.
Pas kësaj, Drejtorië Rajonale në Durrës, Tiranë dhe Shkodër morën masa për gjurmimin e produktit, afishimin e njoftimeve për konsumatorët, si dhe bllokimin e sasisë së mbetur në subjekt.
Nga procesi i kthimit, u evidentua një sasi uji i ambalazhuar prej 456 copë x 1.5 litra e rikthyer në subjektin prodhues.
“Megjithatë, nga kontrolli i mëvonshëm i DRAKU Shkodër, u konstatua se 31,200 copë të prodhuara në datën përkatëse ishin tashmë të shitura dhe të konsumuar nga publiku”.
Zero masa për kompaninë
Kontrolli i Lartë i Shtetit zbulon se, pavarësisht rezultatit jo konform, “nuk u krye asnjë analizë risku, nuk u evidentua shkaku i devijimit cilësor dhe nuk u orientua subjekti për masa të detyrueshme korrigjuese, për të shmangur përsëritjen e rastit”.
Në vijim, KLSH-ja ka konstatuar edhe standarde të shumëfishta të ndjekura nga Autoriteti Kombëtar i Ushqimit për shkelje të ngjashme.
“Në dallim nga një rast i mëparshëm me një tjetër subjekt në Tiranë, ku u vendosën dy masa administrative, në këtë rast nuk është marrë asnjë masë ndëshkuese, pavarësisht provave të mos konformitetit dhe konsumit të produktit nga qytetarët”, thonë audituesit shtetërorë.
Sipas Kontrollit të Lartë të Shtetit, “mos përmbushja në kohë dhe me rigorozitet e procedurave për konstatimin, bllokimin, asgjësimin e produkteve, nga ana e autoritetit kompetent për garantimin e sigurisë ushqimore, rriskon konsumatorët dhe ulin besueshmërinë mbi funksionimin e sistemit të kontrollit në vend”.
A është “Lajthiza”?
Kontrolli i Lartë i Shtetit është kujdesur maksimalisht të mos citojë emrin e kompanisë që ka hedhur në treg shishet e ujit të ambalazhuar me erë të keqe. Megjithatë, në raport përmendet detaji kohor “shtatori”, si momenti kur AKU ishte vënë në lëvizje për kryerjen e verifikimeve nga denoncimet publike.
Në shtator 2024, një numër i konsiderueshëm denoncimesh qytetare mbërritën në media të ndryshme, përfshirë “Boldnews.al”, si edhe në rrjete sociale, ku denoncohej cilësia shumë e keqe e ujit të ambalazhuar që ishte hedhur në treg nga “Lajthiza”.
Në 23 Shtator 2024, një nga faqet në rrjete sociale, “JOQ”, raportoi se kishte marrë shumë denoncime për ujin e pijshëm “Lajthiza” me aromë shumë të keqe.
“Prej disa javësh tanimë, në redaksinë e JOQ ALBANIA kanë mbërritur me qindra denoncime për ujin “Lajthiza”.
Qytetarët shprehen se uji i kësaj firme mban erë të rëndë (erë ilaçesh, kanalizimesh) si në paketimet e vogla ashtu edhe në ato të mëdha.
Edhe pse shumë prej qytetarëve kanë ndryshuar dyqanin ku e kanë blerë, duke menduar se ishte problem i izoluar, sërish kanë hasur të njëjtin problem edhe në dyqane, kioska apo markete të tjera”, raportohej në atë kohë.
Gjithashtu, edhe në faqe të tjera popullore në rrjete sociale morën denoncime të ngjashme.
Denoncimet për cilësinë e ujit “Lajthiza” kanë vijuar edhe gjatë vitit 2025. Dhoma e Tregtisë dhe Industrisë Tiranë (DHTI), në një deklaratë të publikuar në gusht 2025, i konsideroi si lajme të rreme raportimet mbi cilësinë e ujit “Lajthiza”.
Ndërkohë, subjekti “Lajthiza Invest” ka refuzuar për disa muaj t’i përgjigjet një kërkese për informacion të “Boldnews.al”, në të cilën kërkoheshin të dhëna për masat e marra nga kompania për sigurinë e produktit që hidhet në treg./Nga Boldnews.al
