Kryeministri Edi Rama ka reaguar për herë të parë ndaj vendimit të Gjykatës Kushtetuese, e cila la në fuqi vendimin e GJKKO-së për pezullimin nga detyra të Belinda Ballukut, zëvendëskryeministre dhe ministre e Infrastrukturës dhe Energjisë, pasi ajo është marrë e pandehur për shkelje të barazisë në tendera.
Duke folur në Podcastin e tij, Rama akuzoi Gjykatën Kushtetuese se “nuk gjeti forcën” për të mos lejuar, sipas tij, “rimarrjen peng të qeverisë”, duke e cilësuar vendimin si një precedent të paprecedentë në botën demokratike.
Rama deklaroi se as vetë prokurori që ka kërkuar masën e pezullimit nuk e akuzon Ballukun për korrupsion, ndërsa e përshkroi pezullimin si “një mjet të paparë dhe të padëgjuar në botën demokratike”.
Ironikisht, reagimi vjen nga i njëjti kryeministër që për vite me radhë është paraqitur si promotori kryesor dhe mbështetësi më i zëshëm i reformës në drejtësi, duke e cilësuar atë si sukses historik dhe garanci për pavarësinë e institucioneve të reja të drejtësisë.
“Gjykata Kushtetuese, nuk e ka gjetur dot forcën për të mos e lejuar rimarrjen peng të qeverisë së Shqipërisë me një mjet të paparë dhe të padëgjuar në botën demokratike, siç është pezullimi i një anëtari qeverie nga një prokuror dhe një gjykatës në një seancë paraprake, pra pa filluar akoma gjyqi.
Kështu, Shqipëria bëhet për herë të dytë, në dy muaj, shembulli i parë i një budallallëku botëror sepse Gjykata Kushtetuese u mbyt me lugën e ujit të turbullt të tyre që Servantes në librin e tij të famshëm Don Kishoti i Mançës i quan arsyet e Mosarsyes.
Por fakti është që mosvendimmarrja e Gjykatës Kushtetuese e kthen në fuqi pezullimin e ministers, e cila, që të jemi shumë të qartë, pavarësisht se qartësia është një luks dhe një luks i rrallë që mund ta kërkosh, por vështirë ta gjesh në turbullirën e 700 tenxhereve politike e mediatike, nuk akuzohet për korrupsion, as nga vetë prokurori që shpiku pezullimin e anëtarit të qeverisë me vendim të një seance të mbyllur të përgatitjes së një gjyqi.
Sidoqoftë, zhbërja e kësaj shpikjeje 100% “Made in Albania” e drejtësisë së re dhe e drejtësisë ende të papjekur shqiptare, e cila nuk ka lidhje me rastin dhe çështjen konkrete po me një parim të panegociueshëm të demokracisë mbetet një domosdoshmëri për të rigarantuar pavarësinë ekzekutive të parlamentit nga pushteti gjyqësor.
Kështu që, ne do ta vazhdojmë këtë betejë, ku na thirri me pahir çartja antidemokratike e pezullimit të një anëtari qeverie dhe ku fatkeqësisht na mban akoma sot pafuqia e Gjykatës Kushtetuese për të marrë një vendim sa të thjeshtë, – është vendim shumë i thjeshtë se mjafton të marrësh shembull çdo vend të botës që do apo të gjithë vendet e botës bashkë dhe nuk do të gjesh dot një gjë të ngjashme, – por një vendim po aq dhe të nevojshëm për të mos e lënë Shqipërinë vendin e vetëm në planet, ku sot aktualisht me këtë brutalitet të rilegjitimuar nga kjo mosvendimmarrje vetë Presidenti i Republikës mund të pezullohet nga i pari prokuror që gdhihet me këtë ide në kokë. – tha Rama.
