Ish e dashura e Safet Bajrit, Eria Ago, ka kërkuar heqjen e masës “Arrest në shtëpi”, në Gjykatën e Lartë.
Gjykata e Posaçme e Apelit zbuti masën e sigurisë ndaj Agos nga “arrest në burg” në “arrest ne shtëpi”, më 20 nëntor të vitit të kaluar, teksa ajo ka kërkuar heqjen e arrestit shtëpiak në Gjykatën e Lartë.
Eria Ago, dyshohej se ndihmoi Bajrin në vrasjen e Fatbardh Licit. Ajo u arrestua në muajin mars të 2025 pasi dyshohet nga Prokuroria e Posaçme se drejtoi një nga automjetet që u përdor për vrasjen e Fatbardh Licit, ngjarje e shënuar në gusht të vitit 2018 në lagjen Kiras të Shkodrës.
Pavarësisht se 31-vjeçarja i ka mohuar akuzat e prokurorisë për përfshirjen e saj në këtë ngjarje, pretendimet e saj nuk janë marrë parasysh nga gjykata.
Për ekzekutimin e Fatbardh Licit, SPAK ka ngritur akuzat “Vrasje me paramendim”, kryer në formën e veçantë të bashkëpunimit, atë të grupit të strukturuar kriminal, si dhe “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal” ndaj Safet Bajrit, Behar Bajrit dhe Astmer Bilalit.
