Procesi i hartimit të dokumenteve që synojnë t’i japin fund luftës në Ukrainë ka hyrë në fazën finale, deklaroi presidenti ukrainas Volodymyr Zelensky nga Davosi, pas takimit me presidentin amerikan Donald Trump. Sipas tij, konsultimet mes palëve ndodhen tashmë në një stad të avancuar.
Zelensky bëri të ditur se në ditët në vijim pritet të zhvillohet një takim trepalësh i ekipeve teknike nga Shtetet e Bashkuara, Ukraina dhe Rusia në Emiratet e Bashkuara Arabe, me qëllim finalizimin e detajeve të fundit të marrëveshjes.
Presidenti ukrainas theksoi se ekipet e SHBA-së dhe Ukrainës po punojnë “pothuajse çdo ditë” për arritjen e një marrëveshjeje që mund të çojë në përfundimin e luftimeve. Sipas tij, intensiteti i procesit dëshmon vullnetin e qartë të të dyja palëve për të bërë përparim real.
“Ukraina po vepron me sinqeritet dhe vendosmëri të plotë, dhe kjo po jep rezultate. Tani është radha e Rusisë të përgatitet për ta përfunduar këtë luftë dhe për t’i dhënë fund agresionit”, u shpreh Zelensky.
Edhe pse nuk dha detaje për përmbajtjen e dokumenteve në përgatitje, fakti që ato cilësohen si “pothuajse gati” tregon se bisedimet kanë kaluar nga deklaratat e përgjithshme në propozime konkrete, me Uashingtonin që vijon të ketë një rol kyç në përpjekjet ndërmjetësuese.
