Sipas Policisë, 59 drejtues mjetesh janë proceduar penalisht javën e fundit për drejtim mjeti në gjendje të dehur, ndërsa 6 prej tyre janë arrestuar, për shkak të rrezikshmërisë së lartë që kanë paraqitur për jetën e përdoruesve të rrugës.
Gjithashtu, 76 shoferë janë ndëshkuar për mosrespektim të radhës në qarkullim, një shkelje që, sipas Policisë, rrit ndjeshëm rrezikun e aksidenteve dhe përkeqëson fluksin e lëvizjes.
Ndërkohë, 53 automjete janë larguar me karrotrec për parkim të gabuar, me pretendimin se janë liruar hapësira publike dhe janë hequr pengesa për qarkullimin.
Megjithatë, pavarësisht numrit të lartë të gjobave dhe masave ndëshkuese, trafiku në Tiranë vijon të jetë kaotik, sidomos në oraret e pikut.
Bllokimet e gjata, mungesa e disiplinës në qarkullim, parkimet e paligjshme dhe menaxhimi joefektiv i kryqëzimeve mbeten probleme të përditshme për qytetarët.
