Përtej vonesave të përditshme, autobusët “Green Line” të Tiranës po shndërrohen në një rrezik serioz për qytetarët. Aksidenti i mbrëmjes së djeshme, i ndodhur pranë “Pallatit me Shigjeta”, ka vënë sërish në qendër të vëmendjes situatën alarmante të sigurisë në transportin urban.
Aksidenti: 4 persona të plagosur, përfshirë një 18-vjeçare me biçikletë
Autobusi i linjës “Green Line”, në pronësi të Nadir Çaushollit, humbi kontrollin, u përplas me trafikndarësen dhe devijoi në korsinë tjetër të rrugës. Si pasojë, disa qytetarë mbetën të lënduar, ndërsa katër prej tyre u dërguan me urgjencë në spital.
Sipas policisë, një 18-vjeçare që po lëvizte me biçikletë është në spital nën kujdesin e mjekëve.
Përsëritje aksidentesh, por masat mungojnë
Pavarësisht se incidentet e lidhura me këtë linjë janë të shpeshta, reagimi institucional mbetet minimal. Policia, edhe këtë herë, u mjaftua me një njoftim rutinë dhe arrestimin e shoferit, ndërkohë që licenca e operatorit vazhdon të mbetet aktive.
Në njoftimin zyrtar thuhet:
“Efektivët arrestuan shtetasin Ç. Sh., 56 vjeç, pasi dyshohet se mbrëmjen e djeshme ka humbur kontrollin mbi drejtimin e autobuzit dhe është përplasur me një biçikletë ku lëvizte shtetasja G. K., 18 vjeçe, e më pas me dy automjete të parkuara. Të dëmtuarit janë nën kujdesin e mjekëve.”
Ndërkohë, çështja e përgjegjësisë së operatorit dhe kontrollit të licencave mbetet e hapur, pasi kompania ka qenë e përfshirë në një sërë incidentesh të rënda gjatë viteve të fundit.
Aksidentet e përsëritura të autobusëve urbanë në Tiranë
10 mars 2024 – Autobusi i “Green Line” u përplas me një pemë dhe një motomjet në rrugën “Ferit Xhajko”, pasi shoferit dyshohet se i ra të fikët në timon.
27 shkurt 2023 – Aksident masiv te ura e Tajvanit: autobusi u përplas me 9 makina dhe plagosi 9 persona.
29 prill 2022 – Një autobus i linjës ra në lumin e Lanës pranë “Ish-ekspozitës”, duke lënduar 5 pasagjerë.
14 nëntor 2022 – Autobusi i “Go Green” përplasi një Mercedes, duke shkaktuar kaos në qarkullim.
22 prill 2022 – Autobusi i Unazës përplasi një makinë dhe së bashku ranë në shtratin e Lanës.
Seria e gjatë e ngjarjeve tregon një problem të thellë të mungesës së kontrollit dhe standardeve të sigurisë.
Kush është pronari i “Green Line”?
Operatori urban “Green Line” kontrollohet nga biznesmeni Nadir Çausholli, i njohur për fitimin e tenderave të shumtë publikë dhe polemikat për mënyrën e përfitimit të tyre.
Kompania u mor nëpërmjet blerjes së “Gerard-A”, e cila zotëronte licencën e linjës së Kasharit. Pas një serie transaksionesh dhe transferimesh aksionesh, “Green Line” dhe linja e Unazës kaluan plotësisht nën kontrollin e Çaushollit.
Në vitin e fundit, Agjencia e Prokurimit Publik (APP) ndëshkoi “Green Line” duke e përjashtuar për 6 muaj nga tenderat, me argumentin se kompania kishte “dezinformuar autoritetet për qëllime kualifikimi”.
