Orë tensioni janë kaluar dy ditë më parë mes forcave speciale RENEA, policisë së Shkodrës, strukturave të antiterrorit dhe dy radikalëve islamikëve Hamza alias Erzen Uka, Julian Cumraku.
Të dy personat ishin zhvendosur nga zona e Kurbinit në drejtimit të fshatit Orosh, duke qëndruar të vetëm në këtë fshat, banorët e të cilit ishin larguar.
Për shkak të kësaj lëvizje, Uka dhe Cumraku, mësohet të kenë dalë nga mbikqyrja e strukturave të antiterrorit. Përmes përgjimit telefonik ata janë lokalizuar në zonën e Oroshit, duke qëndruar për një periudhë kohe.
Kjo ka bërë që oficerët e antiterrorit në Policinë e Shtetit, të bëjnë një plan verifikimi, duke çuar fillimisht një patrullë policie të komisariatit të Pukës, për të vëzhguar në teren dy personat e mësipërm dhe me çfarë merren ata në këtë fshat.
Policia ka shkuar në Orosh dhe është drejtuar pikërisht në shtëpinë ku i vetmi Oxhak, nxirrte tym. Aty në oborr kanë parë Julian Cumrakun që po çante dru, dhe ky i fundit sapo ka vërejtur prezencën e policisë ka hyrë në shtëpi, duke njoftuar Erzen Ukën dhe më pas të dy së bashku kanë kërcënuar punonjësit e policisë të largohen pasi do i qëllonin me armë.
Deri në mbërritjen e forcave të RENEA-s dhe oficerëve të antiterrorit, Uka dhe Cumraku, kanë pasur kohën të zënë të gjitha dritaret me dërrasa, batanije dhe një kapak kombesate që përdorej tek televizorët e vjetër “Lura”.
Negociatorë të RENEA-s janë përpjekur të bisedojnë dhe bindin dy personat e armatosur, por pa rezultat, pasi nga brenda shtëpisë morën një përgjigje me breshëri kallashnikovi.
Në pamundësi për të dialoguar, policia ka përdorur për të komunikuar dajën e Julian Cumrakut dhe vëllain e Hamza Ukës, të cilët u sollën me urgjencë në Orosh.
Vëllai i Hamza Ukës, ka shkuar dy herë nga prapa shtëpisë me frikën se mos qëllohej nga vëllai i tij. Në të dyja rastet ai s’ka pasur rezultat për të bindur të vëllanë për tu dorëzuar, duke u kthyer tek drejtuesit e policisë me fjalët se:”…nuk kishte çfarë të bënte më tepër, pasi ata janë të rrezikshëm dhe mund ta vrasin dhe atë vetë…”.
Sipas tij gjatë bisedës me vëllain Erzen Uka, ky i fundit i ka thënë se: “…Do luftojmë deri në fund…”.
Por pas disa orësh në pritje, një tentativë e tretë e negocimit nga pas shtëpisë mes dy vëllezërve, ka sjellë dorëzimin pa asnjë kusht të Hamza Ukës dhe mikut të tij, Julian Cumrakut.
Vëllai i ka folur Hamza Ukës se: “…duhet duhet të mendonte për djalin e tij dhe familjen dhe se duhet të largonte xhindet…”. Pas kësaj Uka dhe Cumraku, kanë hapur derën e shtëpisë duke dalë të paarmatosur dhe dorëzuar tek forcat e policisë që kishin rrethuar zonën.
Më pas forcat RENEA hynë në banesë duke zbuluar dhe arsenalin e armëve. Aktualisht ndjekja penale ndaj dy personave po kryhet nga Policia dhe prokuroria e Shkodrës, për akuzën e “Mbajtjes pa lejë të armëve dhe municioneve shpërthyese”, “Kundërshtimi me armë ndaj forcave të Policisë së Shtetit” dhe “Nxitja, thirrja publike dhe propaganda për kryerjen e veprave me qëllime terroriste”.
Në banesë u gjetën 4 armë automatike dhe 1 pistoletë “MiniBlow”, një flamur i organizatës terroriste “ISIS”, 17 granata dore defensive, municion luftarak, kapsolla detonatorë elektrike për shpërthimin e lëndëve eksplozive etj./ Elton Qyno – Syri.net
