Një 57-vjeçar është arrestuar nga policia në Fier pasi është parë duke qarkulluar i armatosur në fshatin Fermë Çlirim.
Bëhet fjalë për Petrit Mërnicën, i cili sipas policisë u kap një lokal të zonës teksa me vete iu gjet 1 armë zjarri pistoletë së bashku me 2 krëhëra me nga 7 fishekë, të cilat i mbante në çantën e dorës.
Petrit Mërnica është babai i Azgan Mërnicës, i riu i cili qëlloi për vdekje efektivin e ‘Shqiponjave’ Novruz Canaliaj, ngjarje e ndodhur në vitin 2024.
Gjithashtu, Petrit Mërnica është një emër i dëgjuar për drejtësinë. Ai ka bërë më parë 20 vite burg për vrasjen e kunatit të tij.
“Gjatë operacionit, shërbimet e Policisë kanë kapur në flagrancë, në një lokal në fshatin Fermë Çlirim, shtetasin P. M., me 1 armë zjarri pistoletë, me 2 krëhëra me nga 7 fishekë, që i mbante në çantën e dorës.
Në vijim të veprimeve procedurale, specialistët për Hetimin e Krimeve të Komisariatit të Policisë Fier arrestuan shtetasin P. M., 57 vjeç, banues në fshatin Sulaj, Fier, i dënuar më parë për vrasje”,- thuhet në njoftimin e Policisë.
Materialet procedurale iu referuan Prokurorisë së Fierit, për veprime të mëtejshme.
