Nga Etleva Merko
Situata emergjente që ka përmbytur vendin tregoi brutalitetin e realitetit: shteti ka rënë në gjunjë, i paralizuar, i paaftë, i zhveshur nga çdo përgjegjësi.
Në vend të reagimit, në vend të ndihmës, në vend të shtetit pamë vetëm tavolina, mbledhje, lajme, pozime. Një spektakël të lodhur që qeveria Rama e shet si “menaxhim krize”, ndërkohë që kriza i ka mbytur shqiptarët, jo politikanët.
Shqipëria sot është nën ujë.
Shumë familje kanë humbur gjithçka.
Dëmet janë të mëdha, dhimbja reale, frika e vërtetë.
Por klasa politike?
Opozita dhe qeveria në parlament, shkëmbejnë batuta, bëjnë propagandë, akuzojnë njëri–tjetrin, ndërsa njerëzit përpiqen të shpëtojnë shtëpitë, jetesën, fëmijët.
Shqiptarët mbyten, politikanët bëjnë show.
Shqiptarët humbasin, politikanët luftojnë për kamera.
Shqiptarët kërkojnë ndihmë, politikanët kërkojnë klikime.
Hajde politikanë, hajde…
Vendin e keni zhytur në ujë, popullin në hall, dhe vetveten në teatër.
