Policia e Tiranës ka realizuar një goditje ndaj një rrjeti të shpërndarjes së lëndëve narkotike, duke vënë në pranga dy kushërinj, Armand Nela, 34 vjeç, dhe Saimir Nela, 31 vjeç. Këta shtetas akuzohen se kishin një rol kyç në furnizimin e tregut të Kokainës në kryeqytet.
Arrestimi i tyre u bë i mundur pas ndalimit të automjetit me të cilin ata po qarkullonin në vendin e quajtur “Treshi”. Gjatë kontrollit të menjëhershëm, forcat e policisë zbuluan dhe sekuestruan dy pako që përmbanin një sasi të konsiderueshme lënde narkotike Kokainë, gjithsej 2 kg e 235 gramë. Përveç drogës, u sekuestrua gjithashtu edhe një pistoletë lodër.
Sipas hetimeve të policisë, dyshohet se dy kushërinjtë Nela shërbenin si furnizues kryesorë, duke i dhënë Kokainë shtetasve dhe grupeve të ndryshme kriminale të cilat më pas e ndanin lëndën në doza, me qëllim shitjen në zonat e njohura si “Alliasi” dhe “Oxhaku” në kryeqytet. Pas këtyre veprimeve procedurale, dy shtetasit u arrestuan për veprën penale “Prodhimi dhe shitja e narkotikëve”. Materialet procedurale i janë referuar Prokurorisë së Tiranës për veprime të mëtejshme hetimore.
