Vetëm katër ditë para mbajtjes së zgjedhjeve të pjesshme lokale, qeveria ka propozuar një projektligj për faljen dhe shuarjen e detyrimeve tatimore dhe doganore, që parashikon lehtësime financiare për biznese dhe individë gjatë vitit 2026.
Projektligji, i cili është pjesë e paketës fiskale 2026 “Për fshirjen, shuarjen dhe pagesën e detyrimeve tatimore ndaj administratës tatimore qendrore dhe detyrimeve të pagueshme në doganë” dhe synon të lehtësojë barrën ekonomike të tatimpaguesve, sipas qeverisë.
Dokumenti është hartuar nga Ministria e Financave dhe u është dërguar për mendim Ministrisë së Drejtësisë dhe Ministrisë së Ekonomisë dhe Inovacionit. Ai pritet të hyjë në fuqi më 1 janar 2026 dhe do të zbatohet deri më 31 dhjetor 2026.
Megjithatë, koha e miratimit të nismës, që vjen vetëm pak ditë përpara zgjedhjeve të pjesshme lokale, ka ngjallur diskutime mbi motivet e saj politike dhe efektet që mund të ketë në elektorat. Kritikët e qeverisë e shohin si një lëvizje me prapavijë elektorale, ndërsa mazhoranca e prezanton si një masë ekonomike për rimëkëmbje dhe ndihmë ndaj biznesit.
