Një aksident tragjik ka ndodhur pas mesnate në qytetin e Vlorës, ku një 17-vjeçar ka humbur jetën pasi u përplas nga një automjet i cili udhëtonte tej normave të lejuara të shpejtësisë.
Ngjarja u regjistrua rreth orës 00:10 të datës 28 tetor 2025, në bulevardin “Ismail Qemali”. Sipas informacioneve zyrtare, automjeti me targë AB737UI, i drejtuar nga Haiti Bajramaj, 32 vjeç, është përplasur me motomjetin me targë CA305, që drejtohej nga Leandro Shametaj, vetëm 17 vjeç.
Përplasja ka qenë shumë e fortë. I riu u transportua menjëherë me urgjencë drejt Spitalit Rajonal të Vlorës, por, pavarësisht përpjekjeve të mjekëve, nuk arriti t’u mbijetojë plagëve të marra dhe ndërroi jetë pak pas mbërritjes në spital.
Drejtuesi i automjetit, Haiti Bajramaj, është shoqëruar në ambientet e Drejtorisë Vendore të Policisë Vlorë për t’u marrë në pyetje. Ndërkohë, grupi hetimor ndodhet në vendngjarje dhe po punon për të sqaruar shkakun dhe rrethanat e plota të aksidentit fatal.
Në spital ndodhen familjarët e 17-vjeçarit, të tronditur dhe të revoltuar nga ngjarja e rëndë. Ata pretendojnë se nuk po marrin informacion të qartë nga autoritetet, ndërsa trupi i të ndjerit është mbajtur për ekspertizë mjeko-ligjore (autopsi).
Gjyshi i Leandros, i dërrmuar nga dhimbja, ka akuzuar autoritetet për mungesë veprimi dhe neglizhencë shtetërore:
“Unë jam gjyshi i të ndjerit. Djali i vajzës time u aksidentua mbrëmë në orën 12 të natës dhe u soll në morgun e spitalit të Vlorës. Kemi rreth 8 orë këtu dhe nuk vjen asnjë mjek për të bërë veprimet e nevojshme. Nuk e dimë çfarë shteti është ky, shtet që nuk punon. Rrinë 30 policë këtu e askush nuk merr asnjë masë për mjekun ligjor. Të vij unë e të marr kufomën pa ekspertizë? Një makinë ma vrau djalin me 220 km në orë dhe asnjë polic nuk ishte në vend. Ky nuk është shtet, është turp!”
Familjarët kërkojnë drejtësi dhe transparencë, duke theksuar se as pas shumë orësh nga ngjarja nuk kanë marrë përgjigje zyrtare nga institucionet.
Ata akuzojnë autoritetet se kanë lënë trupin e të riut pa kryer ekspertizën mjeko-ligjore, ndërsa çdo minutë pritjeje e shton dhimbjen e tyre.
