Izraeli dhe Hamasi kanë nisur në Egjipt bisedimet e para për një armëpushim, bazuar në propozimin e paraqitur nga SHBA. Pas gati dy vitesh lufte të përgjakshme, palët duket se po afrohen drejt një marrëveshjeje që mund t’i japë fund konfliktit në Rripin e Gazës.
Negociatat po përqendrohen në tri çështje kryesore: lirimin e pengjeve izraelite të mbajtura nga Hamasi, lirimin e të burgosurve palestinezë nga burgjet izraelite dhe tërheqjen e pjesshme të ushtrisë izraelite nga Gaza.
Këto pika janë pjesë e fazës së parë të një plani prej 20 pikash të hartuar nga presidenti amerikan Donald Trump, që synon t’i japë fund luftës dhe të rikthejë stabilitetin në rajon. Sipas mediave të huaja Hamasi ka pranuar të diskutojë mundësinë e lirimit të pengjeve dhe tërheqjes nga pushteti në Gaza, duke i dhënë shtysë të re procesit të paqes.
Presidenti Trump i ka quajtur bisedimet “shumë të suksesshme” dhe është shprehur se ato po përparojnë me shpejtësi. Ndërkohë, kryeministri izraelit Benjamin Netanyahu tha se shpreson që brenda pak ditësh të njoftohet lirimi i pengjeve izraelite.
Megjithatë, mbeten ende mospërputhje të mëdha mes palëve, pasi plani amerikan është i gjerë në synime, por i paqartë në detaje. Një nga temat më të ndjeshme është mënyra se si do të ndodhë shkëmbimi i pengjeve dhe të burgosurve, që sipas kushteve të planit duhet të realizohet brenda 72 orëve nga momenti i shpalljes së armëpushimit.
Delegacioni palestinez pritet të kërkojë lirimin e disa figurave politike të njohura, përfshirë Marëan Barghouthin, i cili gëzon popullaritet të madh në Bregun Perëndimor dhe Gaza.
Edhe pse SHBA ka kërkuar ndalimin e bombardimeve, Izraeli ka vijuar sulmet ajrore në Gaza, ku gjatë 24 orëve të fundit janë vrarë të paktën 19 persona, mes tyre edhe dy punonjës ndihmash, sipas ministrisë së shëndetësisë së Gazës.
Bisedimet janë mirëpritur nga zyrtarë ndërkombëtarë, të cilët kanë bërë thirrje për një armëpushim të qëndrueshëm në prag të përvjetorit të dytë të luftës. Presidenti egjiptian Abdel Fatah al-Sisi deklaroi se plani i SHBA-së mund të hapë rrugën për paqe të qëndrueshme dhe njohjen e një shteti palestinez.
“Një armëpushim, lirimi i pengjeve dhe i të burgosurve, rindërtimi i Gazës dhe nisja e një procesi politik drejt njohjes së shtetit palestinez do të thotë se jemi në rrugën e duhur drejt paqes dhe stabilitetit të qëndrueshëm,” u shpreh al-Sisi.
