Një gabim nga Ministria e Brendshme e Britanisë së Madhe rrezikon ekstradimin e bandës së vrasësve që ekzekutuan biznesmenin Ardian Nikulaj, në Prill të vitit 2023, shkruan Daily Mail.
Banda, përfshirë një nënë të re, fluturuan drejt Shëngjinit dhe u paraqitën si turistë ndërsa u sistemuan në një hotel me pesë yje në pronësi të objektivit të tyre, Ardian Nikulaj.
Në gusht të vitit të kaluar, Harriet Bridgeman, 40 vjeç, dhe Thomas Mithan, 37 vjeç, të dy nga Bristoli, dhe Harry Simpson, 34 vjeç, nga Londra jugore , humbën betejën gjyqësore për të bllokuar ekstradimin për t’u përballur me gjyqin në Shqipëri.
Gjykatësi i rrethit Daniel Sternberg gjithashtu hodhi poshtë një apel nga Edmond Haxhia, i akuzuar si organizatori i atentatit ndaj Nikulajt, dhe ia dërgoi të katër çështjet Sekretares së Brendshme të asaj kohe, Yvette Cooper, për t’u miratuar.
Por në gusht, Ministria e Brendshme u tha zyrtarëve shqiptarë se kishin bërë një gabim potencialisht serioz duke i ngatërruar akuzat.
Urdhri i ekstradimit i nënshkruar nga znj. Cooper deklaroi se të katër të dyshuarit ishin akuzuar në Shqipëri për posedim të paligjshëm të armëve të zjarrit dhe municioneve, si dhe për vrasje për shkak të gjakmarrjes.
Por në shtator 2023, qeveria shqiptare kishte thënë se akuzat për armë zjarri ishin rrëzuar dhe akuzat e tjera ishin ndryshuar në “vrasje me paramendim”.
Në një letër të datës 20 gusht, Ministria e Brendshme tha se nuk kishte “asnjë mekanizëm ligjor” që Cooper të korrigjonte gabimin dhe paralajmëroi se kjo mund të çonte në rrëzimin e procedurave të ekstradimit.
Ata u kërkuan zyrtarëve shqiptarë të dërgonin një ‘siguri’ me shkrim në lidhje me akuzat me të cilat do të përballeshin të dyshuarit, për të shmangur shfrytëzimin e gabimit nga avokatët e tyre.
Zyrtarët shqiptarë e kanë siguruar këtë dokument përpara seancës së apelit të të dyshuarve kundër ekstradimit në Gjykatën e Lartë të martën.
Ardian Nikulaj u ekzekuta më 19 Prill 2023 teksa qëndronte në hotelin e tij duke konsumuar kafe. Vrasësi i dyshuar si portugezi Ruben Saraiva, iu afrua dhe e qëlloi nga afër. Vrasësi mbante një skafandër në kokë dhe një veshje motoristi. Pasi ekzekutoi biznesmenin, ai u largua me një motor i cili u fsheh brenda një “Land Rover-i” që e priste ekzekutorin në fshatin Kukël, midis Lezhës dhe Shkodrës.
