Media italiane Corriere Della Sera raporton detaje të reja mbi vrasjen e biznesmenit Edoardo Sarchi, 44 vjeç, nga Cunardo në provincën e Varesës, i cili u gjet i vrarë të shtunën e kaluar në fshatin Salari, Tepelenë.
Sipas mediave italiane, Sarchi nuk u vra me armë zjarri, por u sulmua brutalisht me shkop në kokë. Gjithashtu në artikull shkruhet se ngjarja ka ndodhur përpara syve të tre personave që e shoqëronin, të cilët dhanë versione të ndryshme për rrethanat e vdekjes.
Pjesë nga shkrimi:
Ishin tre persona që atë ditë në mëngjes shoqëronin Sarchin. Ata, shokët e tij të biznesit, dhanë secili një version të ndryshëm, njëri tha që ishte një sulm nga një i panjohur, pra ai personi që papritur doli duke mbajtur një armë në rrugën ku po udhëtonte grupi, në dy Jeep, duke ndalur makinat dhe duke pasur një reagim agresiv, një tjetër tregoi për një grindje që u përshkallëzua mes Sarchit dhe atij personi, që nuk ishte në këmbë, por në makinë, dhe kishte pasur një përplasje, e cila kishte degjeneruar në sulm mes personit në arrati dhe biznesmenit.
Një tjetër version, i nxjerrë apo i ndërtuar me qëllim, është se të tre së bashku me Sarchin ishin për gjueti, dhe dikush, saktësisht kush nuk dihet, kishte qëlluar gabim, dhe plumbi kishte goditur në kokë të ndjerin Sarchi, i cili vdiq menjëherë.
Një aksident, por nuk u gjetën gëzhoja, sepse, siç u tha më parë, arma e vrasjes ishte një shkop. Rast i komplikuar ku zakonisht ekspertiza mjeko-ligjore jep elemente orientuese, jo gjithmonë vendimtare, por kjo nuk ndodhi.
Në orët pasuese, me dëshirën e gruas së Sarchit (e cila mban pjesë të mëdha në biznes), u mbajtën funeralet në mënyrë private dhe shumë shpejt. Pa një autopsi paraprake, pa procedurat e zakonshme dhe kërkesën e organeve hetimore për të analizuar trupin nga ekspertët.
Hetimi, praktikisht, konsiderohet i mbyllur, ose të paktën hetuesit janë të orientuar të nxjerrin përfundimet e tyre. Personi në arrati kërkohet për vrasje, mbajtje të paligjshme të armëve dhe trafik droge, në shtëpinë e tij u gjetën pushkë gjuetie dhe fara kanabisi.
