Plot 3 milionë euro pasuri i janë sekuestruar noteres Sanja Telhallari në Tiranë, të cilat dyshohet se janë të ardhura nga krimi. Bëhet fjalë për 13 pasuri të paluajtshme, mes tyre një vilë luksoze në kompleksin rezidencial “Rolling Hills”. Po ashtu, në sekuestro janë vënë edhe 5 llogari bankare, vlera e të cilave ende nuk dihet.
Seksioni për Hetimin e Pastrimit të Parave pranë Policisë së Tiranës prej disa kohësh kishte nisur hetimet për pasuritë e noteres Sanja Telhallari. Hetimet nisën që pas ngjarjes ku në zonën e Astirit tentuan që ti vidhnin mjetin noteres.
Hetuesit panë që mjeti luksoz i noteres “G Class” si dhe verifikuan pasuritë e tjera të saj, të cilat nuk justifikoheshin nga të ardhurat.
Hetimet
Seksioni kundër Pastrimit të Parave, me urdhër të prokurorit të Tiranës Ndini Tavani sekuestruan disa pasuri në emër të Telhallarit si vilën luksoze, disa apartamente dhe biznese në Tiranë. Llogaritë bankare do të jenë gjithashtu në sitën e hetuesve, ku dyshohet se në banka të ndryshme noterja ka afro 200 mijë euro.
Ndërkohë, janë dhe pasuri të tjera që dyshohet se janë të Telhallarit, por që janë me kontratë porosie dhe jo me certifikatë pronësie. Këto janë duke i verifikuar ende nga grupi hetimor.
“Në kuadër të një procedimi penal, të iniciuar në Prokurorinë e Tiranës, me objekt gjurmimin e aseteve kriminale, të dyshuara të përfituara nga shtetasja S. T., 35 vjeçe, banuese në Tiranë, gjatë kryerjes së detyrës si notere, Seksioni për Hetimin e Pastrimit të Parave dhe Aseteve Kriminale finalizoi operacionin “Nënshkrimi”.
Në vijim të veprimeve procedurale, të kryera në kuadër të këtij procedimi, u ekzekutua vendimi i Gjykatës së Tiranës, për ekzekutimin e 18 pasurive të 35-vjeçares, me vlerë 3 milionë euro, konkretisht 13 pasuri të paluajtshme dhe 5 llogari bankare“, njoftoi Policia e Tiranës.
Ndërkohë, Prokuroria e Tiranës thotë se nuk justifikonte të ardhurat si notere dhe se një pjesë janë blerë nga të ardhurat e ish-burrit. Ky i fundit është shpallur në kërkim ndërkombëtar nga autoritetet italiane.
Kjo pasi është dënuar për vepra të rënda penale, përfshirë veprën penale të “Shfrytëzimit të prostitucionit”, me një dënim maksimal deri në 21 vjet burgim.
